Муборак тумани ҳокими Улуғбек Эрназаров лавозимидан олинди. Бу ҳақда хабар берган вилоят ҳокимлиги ахборот хизмати раҳбари Аҳрор Содиқовнинг ёзишича, Зоир Мирзаев тумандаги кўрсаткичлардан қониқиш ҳосил қилмаган.
Маълум бўлишича, айни пайтда вилоят ҳокими Зоир Мирзаев иштирокида Муборак туманида танқидий йиғилиш бўлиб ўтмоқда.
Йиғилишда сўз олган Зоир Мирзаев Муборак тумани бўйича етиштирилган 10,4 минг тонна гўшт маҳсулотларининг 0,7 тоннаси ёки бор йўғи 6,9 фоизи қайта ишланаётганини айтиб, етиштирилаётган 915 тонна жун ва 28 миллион дм тери умуман қайта ишланмаслигини танқид қилган.
«Ҳисобот даврида туманда 1046 та кичик бизнес субъектлари мавжуд бўлиб, шундан 210 таси ёки 20 фоизи фаолият кўрсатмаяпти. 88,4 минг нафар аҳоли бўлган туманда ишсизлик юқори. Хорижга ишлаш учун кетганлар 1334 нафарни ташкил қилмоқда. Туман аҳолиси бахтига нефть-газ заводлари борлиги — раҳбарларнинг омади», — деган Зоир Мирзаев.
Йиғилишда, шунингдек, туман аҳолисининг 27,3 фоизи марказлашган ичимлик суви билан таъминлангани, 14 та маҳалланинг 47 808 нафар аҳолисига тоза ичимлик суви тармоқлари етиб бормагани, 7 та маҳалланинг 23431 нафар аҳолисига ичимлик суви ташиб келтирилиши тилга олинган.
«Тумандаги мавжуд 134 та кўп қаватли уй-жойнинг 60 фоизи ёки 81 таси таъмирталаб ҳолга келиб қолган. Далада, заводда меҳнат қилаётган туман аҳолиси шундай шароитда яшашга муносибми?», — дея савол берган вилоят раҳбари.
Зоир Мирзаев йиғилишда депутатлар ва ҳоким ўринбосарларини ҳам танқид қилиб, «Депутат уйғонмаса, ҳоким ёки ўринбосарлар уйғонмаса, туманнинг салоҳияти ҳам, яшаш шароити ҳам, таълим тизими ҳам ортга қараб кетаверади. Аслида, ривожланиш даврида олдинга қараб ҳаракатланишимиз керак эмасми?», — деган.
Вилоят ҳокими танқидий йиғилишда туман масъулларига Деҳқонобод тумани ҳокими Зоир Алиқулов фаолиятини намуна қилиб кўрсатган.
«Аҳолининг туман раҳбарларига мурожаати эътиборсиз қолавергани сабабли вилоят ва республикага қайта-қайта мурожаат қилиш кўпайган. Деҳқонобод ҳокими Зоир Алиқулов туни билан фуқароларни қабул қиляпти. Бошқа туман раҳбарлари қандай ишлаётганини ижтимоий тармоқларда кузатиб боринглар, деди Зоир Мирзаев», — дея хабар беради вилоят раҳбари сўзларидан иқтибос келтирган Аҳрор Содиқов.
Изоҳ (0)