Франция президенти Эммануэль Макроннинг мамлакат бўйлаб сафари чоғида номаълум киши унинг юзига тарсаки туширди, дея хабар беради BFM телеканали.

Фото: meduza.io

Ҳодиса 8 июнь куни Франция жануби-шарқидаги Дром департаментининг Тен-ЛъЭрмитаж коммунасида ўтказилган фуқаролар билан учрашувда содир бўлган.

Давлат раҳбари панжара ортида кутиб турган маҳаллий аҳоли ёнига бориб, унга қўл узатган фуқаролардан бири билан саломлашиш учун қўл чўзган. Аммо фуқаро «Йўқолсин Макрон Францияси» («à bas la Macronie») дея бақирганча унинг юзига зарб билан тарсаки туширган.

Французларнинг аксарият қисми асосий масалаларга қизиқмоқда. Намойишларда ҳар доим учраб турадиган индивидуал ҳодисалар ва радикалларнинг жамоат кун тартибини эгаллашига йўл қўймайлик, улар бунга арзимайди», — дея таъкидлади президент.

Макронга тарсаки туширган шахс воқеа жойида қўлга олиниб, полицияга топширилган. Бундан ташқари, ҳуқуқни муҳофаза қилиш органлари ходимлари яна бир кишини ҳибсга олган. У тарсаки туширган одам билан бирга келган ва воқеани видеога олган.

Қайд этилишича, президентга қилинган ҳужум билан боғлиқ оғирлаштирувчи ҳолатлар туфайли улар уч йилгача қамоқ жазоси ва 45 000 еврогача жаримага тортилиши мумкин.

Француз сиёсатчилари воқеани қаттиқ қоралади. Депутат Эрик Кокерелнинг айтишича, Макронни урган одам бақириб айтган сўзлар ўта ўнг монархистлар орасидаги машҳур шиор ҳисобланади.

Бош вазир Жан Кастекс бу ҳодисани демократияга зарба деб атади. Унинг таъкидлашича, демократия — ҳар доим мунозара ва турли хил фикрларнинг тўқнашуви, аммо ҳақорат ёки зўравонлик эмас.