Паррандачилик корхоналари учун фойда, мол-мулк, ер ва сув солиқлари ставкалари 50 фоизга камайтирилади. Бу ҳақда Президент Шавкат Мирзиёев раислигида 8 июнь, сешанба куни ўтказилган йиғилишда давлат раҳбари сўз юритди, дея хабар бермоқда «Дарё» мухбири.
«Паррандачилик соҳасида 1,1 мингта корхоналарнинг қуввати 50 фоизга ҳам ишлатилмаяпти. Ваҳоланки, бу борада имкониятлар етарли.
Биргина мисол, «Жомбой наслли парранда» корхонасида озуқа-ем ишлаб чиқариш, инкубацион цех, парранда кушхонасини ташкил этиб, тухум таннархининг 25 фоиз арзон бўлишига эришган. Шунингдек, корхона кооперация усулида 40 та хонадоннинг ҳар бирига 5 мингтадан жўжа ва озуқа тарқатиб, ветеринария хизматини ҳамда маҳсулотни сотиб олишни йўлга қўйган.
Энди, парранда саноатини қўллаб-қувватлаш бўйича янги механизмлар жорий этилади. 1 июлдан берилиши керак бўлган субсидия миқдори тухум учун 3 баравар (ҳар бир сотилган тухумга 150 сўм), парранда гўшти учун эса 2 баравар (ҳар бир килограммига 1,5 минг сўм) оширилиб, тўловлар 1 июндан бошланади.
Омихта ем ва паррандачилик маҳсулотлари ишлаб чиқарувчиларга айланма маблағни тўлдириш ва паррандачилик лойиҳалари учун кредитларнинг Марказий банк асосий ставкасидан юқори қисми қоплаб берилади.
Паррандаларни сўйишга мўлжалланган замонавий комплекс лойиҳалари бўйича харажатларнинг бир қисми компенсация қилинади. Паррандачилик корхоналари учун фойда, мол-мулк, ер ва сув солиқлари ставкалари 50 фоизга камайтирилади.
Қўчқоров, Ғуломов, Ғаниев, Мавлонов бир ҳафта муддатда ушбу янги механизмларни жорий қилиш бўйича қарор лойиҳасини кирицин.
Вилоят, туман ва шаҳар ҳокимлари янги лойиҳалар ортидан қувмасдан, икки ҳафта муддатда мавжуд корхоналарни йил якунига қадар тўлиқ қувватларга чиқишини таъминлаш бўйича дастурларни тасдиқласин», — деди Шавкат Мирзиёев.
Изоҳ (0)