Тошкентда ўзини ҳарбий хизматчи дея таништириб, фуқароларни 80 млн сўмга чув туширган шахс ушланди

Тошкентда 1 июнь куни «Olx.uz» эълонлар сервиси орқали фуқароларни чув тушириб юрган А.А. исмли шахс қўлга олинди. Бу ҳақда ИИВ Киберхавфсизлик маркази ахборот хизмати хабар берди.

Маълум қилинишича, гумонланувчи «Olx.uz»га Тошкент марказида жойлашган барча қулайликларга эга хонадонни арзон нархда ижарага бериши ҳақида эълон жойлаштирган. Мурожаат қилганларга ўзини ҳарбий хизматчи деб таништириб, бошқа вилоятда эканини ва хизмат сафаридан 2-3 кунда пойтахтга қайтгач, ижарага олувчига хонадонни кўрсатишини, аммо бошқа одамга ижарага бермаслик учун олдиндан пластик картасига пул ўтказиб бериши кераклигини айтиб келган.

Шу тариқа, фирибгар 100 дан ортиқ фуқароларнинг ҳар биридан 200 минг сўмдан 2 миллион сўмгача, бир йил давомида 80 миллион сўмдан ортиқ пулларни ўзлаштирган.

Ҳозирда А.А.га нисбатан эҳтиёт чораси қўлланилган, унинг жиноий шерикларини аниқлаш бўйича суриштирув ва тергов олиб борилмоқда.

Аввалроқ Тошкентда қалбаки валюталар эвазига телефон харид қилиб, ўнлаб фуқароларни чув туширган шахс қўлга олингани, Самарқандда фуқарони 50 минг долларга чув туширган адвокат устидан жиноят иши қўзғатилгани, Қашқадарёда 14 ёшли қизнинг «бошини айлантириб», отасига тегишли 7,3 минг долларни қўлга киритган йигит ушлангани тўғрисида хабар берилганди.