Zafar Hoshimov “Korzinka.uz”ning diplomlilarga bo‘lgan munosabati haqida gapirdi

“Korzinka.uz” supermarketlar tarmog‘i asoschisi Zafar Hoshimov bugungi kunda diplom kerakmasligi to‘g‘risidagi fikrga qo‘shilishini, biroq ta’limga ehtiyoj borligini ta’kidladi. Bu haqda u qirg‘izistonlik bloger Adilet Nogoybayev bilan suhbatda ma’lum qilgan, deb yozadi Spot.

“Diplom shunchaki ta’lim ko‘rganlikni tasdiqlaydi, biroq sizda diplom bor-u, lekin bilim bo‘lmasa, bu g‘alati”, — deydi tadbirkor.

Zafar Hoshimovning so‘zlariga ko‘ra, u ushbu mavzuni oliy ma’lumotli insonlarni ishga olish fikriga sodiq bo‘lgan ukasi (Alisher Hoshimov, “Korzinka.uz” rahbarlaridan biri — tahr.) bilan muhokama qilgan. Bu oliy ma’lumotli inson dedlayn, belgilangan muddat va shunga o‘xshash narsalarni tushunishi bilan izohlangan.

“Bir tomondan, diplom ahamiyatga ega emas, biroq boshqa tomondan, u inson o‘ziga maqsad qo‘yganini, universitetga kirgani, bosqichlardan o‘tgani, imtihonlarni topshirgani, kurs ishlarini yozganidan dalolat beradi. Ya’ni, task-based management bo‘lib chiqadi va u inson buni o‘zida sinab ko‘rgan bo‘ladi”, — deydi tadbirkor.

Avvalroq Zafar Hoshimov “Korzinka.uz” 40 million dollar jalb etish uchun Singapurda kompaniya yaratishga to‘g‘ri kelganini ma’lum qilgandi.