«Терма жамоа муваффақияти шахсий муаммолардан устун». Карим Бензема 6 йиллик тақиқдан сўнг Франция терма жамоасига қайтгани ҳақида

Дидье Дешам Франция терма жамоасининг Евро—2020 мусобақаси учун қайдномани эълон қилди. Ундан «Реал» ҳужумчиси Карим Бензема ҳам ўрин олди.

Бензема терма жамоа сафида сўнгги бор 2015 йилнинг октябрида ҳаракат қилган — 2051 кун аввал. Ўшанда французлар Арманистонни 4:0 ҳисобида доғда қолдирган, Бензема дубль қайд этиб, Антуан Гризманнинг голига ҳаммуаллиф бўлганди.

Бу вақтни тасаввур қилиш учун: Евро—2020 қайдномасидан ўша ўйинда иштирок этган фақат 8 футболчи ўрин олди — Гризманн, Уго Льорис, Рафаэл Варан, Оливье Жиру, Мусса Сиссоко, Курт Зума, Люка Дин ва Бензема. У таркибда Патрис Эвра, Мамаду Сако, Лассана Диарра каби ўйинчилар бор эди.

Терма жамоадан кетиш сабаби

Карим 2015 йилда жамоадоши Матё Вальбуэна билан бўлган можаролар сабаб терма жамоадан четлатилганди. Ўшанда номаълум шахслар Вальбуэнанинг ишқий муносабатлари тасвирланган видеони тарқатиб юбориш билан қўрқитиб, ундан пул талаб қилган, Бензема эса жиноятчилар ва Вальбуэна ўртасида воситачи бўлгани гумон қилинган.

Ўшанда Бенземадан ҳатто Франция сиёсатчилари ҳам юз ўгирганди. Франция бош вазири Мануэль Валс терма жамоада Бенземага ўрин йўқлигини айтганди. Натижада Карим Евро—2016 га чақирилмади ва бунда Дидье Дешамни айблади.

Шундан кейин Франция футбол федерация раҳбари Бензема учун терма жамоа эшиклари ёпилганини айтди. Бунга жавобан Карим ота-онасининг ватани бўлган Жазоир фуқаролигини олмоқчи бўлди, бироқ бу жараён жуда мураккаб эди.

Айтганча, Бензема ва Вальбуэнанинг «шантаж иши» ҳали якунига етмади. Жорий йилнинг октябрь ойида Карим айбланувчилардан бири сифатида судда қиштирок этади. Бироқ бу унинг Евро—2020 мусобақасига чақирилишига халал бермади.

Дешам январь ойида Бенземага илтимос билан чиқмаслигини айтганди. Бироқ улар учрашди — ва Карим терма жамоада

Қизиғи, Дешам қишда ҳам Бенземани терма жамоада кўриш нияти йўқлигини айтганди ва бу футбол туфайли эмас, ҳужумчи уни ирқчиликда айблагани учун.

«Бу ҳали менинг хотирамда қолган. Гарчи бу бироз вақт ўтиб унутилса ҳам, барибир мен ҳеч қачон ёддан чиқара олмайман. Бу мураббийнинг тактика, техник жиҳатлар билан боғлиқ танловига алоқадор бўлса тушунарли. Бироқ бу ерда чегарадан ўтиб кетилганди. Бу менинг номимга, оиламга иснод келтирди. Бу мен учун ҳурматсизлик», — деган эди Дешам.

Ярим йилдан камроқ вақт ўтди, Бензема эса терма жамоада. Дешам бу қарор ўзиники эканини маълум қилди:

«Уни терма жамоага чақириш қарорини ҳозиргина қабул қилдим. Бироқ бу фикр миямда қанчадир вақт мобайнида айланиб юрганди. Мен у билан учрашдим, узун суҳбат қурдик, кейин яхшилаб ўйлаб кўрдим ва шу қарорга келдим. Бу суҳбат тафсилотларини очиқламоқчи эмасман. Уни ташкил қилиш истаги кимдан чиққани ҳам муҳим эмас.

Менда жавобгарлик бор — жамоанинг муваффақияти шахсий муаммоларимдан устун. Каримнинг келиши терма жамоа муҳитига таъсир қиладими? Жавобим қароримда мужассам. Ҳатто 23 футболчидан иборат таркиб бўлганда ҳам, Карим ундан жой олган бўларди».

Франция терма жамоасида ҳужумчилар билан боғлиқ муаммо бор. Бензема уни ҳал қилиши керак

Ғалати эшитилмасин, амалдаги Жаҳон чемпионида ҳужумчилар билан боғлиқ муаммо бор. Март ойидаги йиғинларга Дешам олти нафар ҳужум вакилини жалб қилди: Оливье Жиру, Килиан Мбаппе, Антуан Гризманн, Антони Марсьяль ва Виссам бен-Еддер.

Украина, Қозоғистон ва Боснияга қарши кечган баҳсларда улар иккита гол (иккиси ҳам Гризманн) уришга эришди. Шу билан бирга терма жамоада Гризманн доим ҳам марказий ҳужумда ўйнамайди, Мбаппе кўпинча қанотда ҳаракат қилади, Марсьяль эса жароҳат олган ва мусобақа стартига қадар формага қайтиши эҳтимоли кам.

Жиру 2020 йилда яхши статистика қайд этаётганди, бироқ Томас Тухель «Челси»га келиши билан футболчи захира ўриндиғига «михланди». У 21 мартдан буён асосий таркибда майдонга тушмади.

Шундан экан Бенземанинг таклиф қилишини мантиқли қарор: 33 ёшли форвард жорий мавсумдаги 45 та ўйинда 29 та гол урди.

Францияни Евро—2020 гуруҳ босқичидаёқ Германия ва Португалияга қарши қийин ўйинлар кутмоқда.

Кўплаб футболчилар Бенземанинг қайтганидан мамнун, Килиан аллақачон Каримни табриклади.

Бу қарорга фақат Оливье Жиру қарши бўлиши мумкин. Бензема аввалроқ уни ўзи билан солиштирганди: «Қисқа қиламан: келинг, Формула-1 билан картингни адаштирмаймиз. У ҳақда бошқа гапиришни хоҳламайман. Формула-1 мен эканимни биламан». Бироқ журналист Сабер Десфаржга кўра, Оливье Каримнинг терма жамоага қайтарилишини ёқлаб чиққанлар қаторида бўлган.

Дешамнинг фикрича икки ҳужумчи биргаликда ҳаракат қила олади: «Улар бир-бирига халал бермайди, улар биргаликда тўп сурган. Таркибда иккисига ҳам жой бор. Шуниси аниқки, Жирунинг клубдаги ҳолати февралдан бери оғир аҳволда».

Каримнинг ўзи бу қарордан хурсанд: «Терма жамоага қайтишдан шодман. Менга ишонч билдирганларидан миннатдорман. Мени ҳар куни қўллаб-қувватлаган ва куч берган оилам, дўстларим, клубим, барчага раҳмат айтаман».