Bloomberg Billionaires Index версиясига кўра, америкалик тадбиркор, Tesla компаниясининг асосчиси ва ижрочи директори Илон Маск дунёнинг энг бой одамлари рўйхатидаги иккинчи ўринни бой берди.
Фото: Reuters
18 май куни Bloomberg Tesla акцияларининг арзонлашиши фонида Маскнинг бойлиги 3,16 миллиард долларга камайиб, 160,6 миллиард долларгача тушганини эълон қилди. LVMH корпорациясига, шу жумладан, Louis Vuitton ва Sephora брендларига эгалик қилувчи франциялик Бернар Арнонинг оиласи рўйхатнинг иккинчи поғонасига кўтарилди. Bloomberg унинг бойлигини 161,2 миллиард долларга баҳоламоқда.
Лекин Forbes аввалгидек Маскни Amazon асосчиси Жефф Безосдан кейин дунёнинг иккинчи энг бадавлат одами деб ҳисобламоқда. Журнал версиясига кўра, Маскнинг бойлиги 151 миллиард долларни, Арно оиласининг бойлиги 150 миллиард долларни ташкил қилмоқда.
2021 йилнинг бошидан буён Tesla асосчиси Жефф Безосни икки марта ортда қолдирди ва дунёнинг энг бой одамлари рўйхатида биринчи ўринга кўтарилди. Лекин охирги икки ҳафтадаги воқеалар унинг бойлигини сезиларли даражада камайтирди.
9 май куни тадбиркор NBC телеканалининг Saturday Night Live кўрсатувида бошловчи сифатида чиқиш қилди ва эфирда Аспергер синдромидан азият чекишини тан олди, ўзининг бизнес режалари ва ғояларидан кулди, шунингдек, ўзи бир неча маротаба гапирган Dogecoin криптовалютасини фирибгарлик деб атади.
Шундан кейин Маск Tesla’нинг электромобилларга тўлов тариқасида биткоин қабул қилишни тўхтатаётганини, шунингдек, ўзининг криптоактивлари билан ҳеч қандай операцияларни амалга оширмаслигини маълум қилди. Миллардер бу қарорини биткоин майнинги учун қазиб олинадиган энергия манбаидан фойдаланилаётгани, улар эса иссиқхона чиқиндиларининг пайдо бўлишига олиб келишидан хавотирда экани билан изоҳлади.
Шундан кейин криптобиржада биткоинннинг нархи кескин пасая бошлади. Маскнинг баёноти фонида Tesla акциялари ҳам 15 фоизга арзонлашди. Бунинг натижасида компаниянинг 21 фоиз улушига эгалик қилувчи Маск бир ҳафта ичида 20 миллиард доллар йўқотди.
Кейинчалик Маск аввал 1,5 миллиард долларга баҳоланган криптоактивларини сотиб юбориш эҳтимолини инкор этмади. Ушбу баёнотлардан кейин криптовалюта нархларининг янги пасайишлари кузатилди — уч ой ичида биринчи марта биткоиннинг нархи 45 минг доллардан арзонлади.
Маълумот учун, Tesla компанияси 24 март куни ўз маҳсулотлари учун биткоинлар билан тўлаш имкониятини қўшган эди.
