Ўзбекистон ҳудуди ҳафтанинг биринчи ярмида Эрон ҳудудидан келадиган ёзги ҳарорат қийматларига хос бўлган жуда иссиқ ҳаво таъсирида бўлади, деб хабар бермоқда «Ўзгидромет». Кўпчилик вилоятларда қуруқ, асосан кам булутли об-ҳаво бўлиши кутилмоқда, фақат республиканинг тоғли ҳудудларида момақалдироқ билан маҳаллий ёмғирлар ёғади.
Кундуз кунги ҳаво ҳарорати 32-35 даражагача, жанубда ва чўл ҳудудларида 38 даражагача кўтарилади. «Ўгидромет» синоптикларига кўра, бу ўртача кўп йиллик қийматлардан 5-8 даражага кўпдир, бироқ бу қийматлар ушбу кунлар учун ҳароратнинг мутлақ максимумидан кам. Энг илиқ йилларда ушбу муддатларда кундузги ҳаво ҳарорати 38-40 даражагача, жанубда 40-42 даражагача кўтарилган.
Ҳафтанинг охирига келиб, ҳарорат 27-30 даражагача пасаяди, бундай ҳолат Қозоғистон ҳудудларидан салқин ҳаво кириб келиши билан боғлиқ бўлади.
20—21 май кунлари республиканинг баъзи жойларида шамол 15-20 метр/секундгача кучайиши кутилмоқда.
«Ўзгидромет»нинг огоҳлантиришича, 17—20 май кунларида республиканинг тоғолди ва тоғли ҳудудларида маҳаллий ёмғир ёғиши ҳисобига сел хавфи бор.
Изоҳ (0)