17 май, душанба кунидан Туркияда коронавирус билан касалланиш даражасининг ўсиши муносабати билан киритилган чекловлар юмшатилади. Anadolu хабарига кўра, Туркия Ички ишлар вазирлиги «Босқичма-босқич нормал ҳаётга қайтиш тўғрисида»ги дастур ҳудудий ҳокимиятларга юборилган, деб ёзади «РБК».

Фото: «Дарё» / Мадина Нурман

Энди фуқаролар иш вақтидан ташқарида автобус ва поездларнинг 50 фоиз қисми йўловчилар билан тўлиш шарти билан жамоат транспортида шаҳарлараро сафарларни амалга ошириши мумкин бўлади. Вояга етмаганлар ва 65 ёшдан ошган фуқаролар бундан мустасно.

Бундан ташқари, савдо марказлари, хўжалик ва галантерея дўконлари иш кунлари 10:00 дан 20:00 гача ишлайди. Озиқ-овқат дўконлари ва бозорлар дам олиш кунлари ҳам ишлаши мумкин, фақат уларнинг иш вақти 10:00 дан 17:00 гача чегараланади.

Айни вақтда иш кунлари 21:00 дан 5:00 гача, дам олиш кунлари эса кечаю кундуз давом этадиган комендантлик соати 1 июнгача сақланиб қолади. Туркия ИИВ кўрсатмасида алоҳида айтилишича, бу чоралар сайёҳлар ва Туркияга қисқа муддатга келганлар учун амал қилмайди, аммо мамлакатда истиқомат қилувчи чет элликлар уларга амал қилиши керак.

Апрель ойи ўрталарида Туркия ҳукумати COVID-19’га чалиниш ҳолатининг ортиши муносабати билан чеклов чораларини кучайтирди. Мамлакатда комендантлик соати давомийлиги соат 19:00 дан 05:00 гача узайтирилди, ресторан ва кафеларга фақат етказиб бериш ва олиб кетиш режимида ишлашга рухсат берилди, спорт заллари ёпилди, ёпиқ биноларда тадбир ўтказиш тақиқланди.

Май ойида Туркияда янги чора-тадбирлар кучга кирди, унга кўра, дўконларда фақат асосий озиқ-овқат ва гигиена маҳсулотларини сотишга рухсат берилди. Шу тарзда илгари спиртли ичимликлар савдосига қўйилган тақиқ эндиликда электроника, ўйинчоқлар, офис буюмлари, кийим-кечак, автоулов аксессуарлари, дастурхон ва томорқа буюмлари учун ҳам амал қила бошлади.

14 май куни Туркия президенти Ражаб Тоййиб Эрдўғон 17 майдан чекловларни босқичма-босқич бекор қилишни режалаштирилаётгани, июнь ойига келиб Туркия ўз фуқароларининг ҳаётини янада енгиллаштириш учун чеклов чораларини «сезиларли даражада юмшатмоқчи»лигини айтган эди.

Туркия Соғлиқни сақлаш вазирлиги маълумотларига кўра, 15 май ҳолатига мамлакатда 11,5 минг кишида коронавирус аниқланган, 236 киши вирусдан вафот этган. Пандемия бошидан буён 5,1 миллион киши касалланиб, 44,5 минг одам ҳаётдан кўз юмган.