Франциянинг 90 дан ортиқ нафақага чиққан полициячиси мамлакатнинг хавфсизлик масалаларига жиддий эътибор қаратишини талаб қилиб, давлат раҳбари Эммануэль Макронга хат ёзди. Бу ҳақда Valeurs Actuelles нашрига таяниб, «РБК» хабар берди.

Франция президенти Эммануэль Макрон

Фото: Reuters

Собиқ полиция ходимлари мамлакатда «хавфсизлик ва жамият осойишталиги масаласида ўта жиддий вазият» юзага келганини таъкидлаб, ҳукуматни бу муаммони назорат остига олишга чақирди. Шунингдек, улар Францияда «мамлакатни қайта забт этиш учун чоралар кўриш» кераклигини айтмоқда.

Собиқ полициячиларнинг аниқлик киритишича, мамлакатнинг баъзи ҳудудларида қонунлар ишламайди, «тажовузкор гуруҳлар» эса ҳукуматга қарши чиқмоқда.

Президентга мурожаат муаллифлари «урушнинг олдини олиш учун» полиция ходимларини ҳарбий хизматчилар билан алмаштиришни тўхтатиш кераклигини таъкидламоқда.

Мактубга Миллий полиция раҳбари Фредерик Во жавоб қайтарди. У нафақага чиқиш собиқ полициячиларни жамоат тартибини сақлашдан озод қилмаслигини айтди ва ҳукуматнинг полиция ходимларини ҳимоя қилиш борасида сезиларли ютуқларга эришганини таъкидлади. Полиция раҳбари собиқ ҳамкасбларининг демарши полиция институтини кучайтириш ўрнига, уни сусайтиради, деб хулоса берди.

Апрель ойининг охирида нафақадаги ва амалдаги бир гуруҳ полиция ходимлари диний экстремистларнинг мамлакатдаги турли ҳудудларда ўз қоидаларини ўрната бошлаганини қайд этиб, Макронга мактуб йўллаган эди. Улар аслида мамлакатда ирқий кураш кетаётганини айтган.

Франция Қуролли кучларининг штаб раҳбари хат муаллифлари жазоланишини маълум қилган. Мамлакат қонунларига мувофиқ, ҳарбийларнинг сиёсий ёки диний масалаларга муносабат билдириши тақиқланади.

Шунга қарамай, май ойининг бошида амалдаги ҳарбий хизмат ходимлари Макронга, шунингдек, вазирлар, парламент аъзолари ва олий ҳарбий амалдорларга хат ёзди. Улар ўз мурожаатида ҳукуматнинг биринчи хат муаллифларига бўлган муносабатини қоралаб, мактуб йўлловчиларга «исёнчига қилингандек муомалада бўлгани, лекин уларнинг ягона айби ўз ватанини севиши, унинг таназзулидан хавотирда экани»ни таъкидлаган.

Иккинчи мактуб муаллифлари ҳам Францияда юзага келиши мумкин бўлган фуқаролар уруши, мамлакатга нисбатан таҳдидларнинг ортиб бориши ҳақида огоҳлантирган.

Аввалроқ Макрон Париж яқинида полициячининг ўлдирилишини диний экстремизм деб атаган эди. Қотиллик полиция участкасининг кираверишида содир этилган. Жиноятчи бинога кираётган аёлга ҳужум қилиб, унинг томоғига пичоқ урган. Бошқа полиция ходимлари жиноятчига қарата ўқ узган ва у воқеа жойида ҳалок бўлган.

Эслатиб ўтамиз, 2020 йилнинг октябрь ойида Францияда тарих фани ўқитувчиси ўқувчиларга Charlie Hebdo нашри томонидан чоп этилган Муҳаммад пайғамбар (с.а.в.)нинг карикатура суратини кўрсатган. Шундан сўнг ўқитувчи чеченистонлик 18 ёшли муҳожир томонидан ўлдирилган. Бу воқеа Францияда кенг жамоатчиликнинг муҳокамасига сабаб бўлди. Ўлдирилган ўқитувчи билан видолашиш маросимида Франция президенти Эммануэль Макрон мамлакат сўз эркинлигидан, жумладан, карикатура борасидаги эркинликдан воз кечмаслигини маълум қилган. Франция президентининг мазкур баёноти ортидан Яқин Шарқдаги баъзи мамлакатларда Францияда ишлаб чиқарилган маҳсулотларни бойкот қилиш бошланди.

Кейинчалик Макрон Муҳаммад (с.а.в.) карикатуралари туфайли мусулмонларда пайдо бўлган ҳис-туйғуларни тушунишини айтди, аммо уларни ҳукумат эмас, мустақил ОАВлар чиқараётганини таъкидлади.