40 ёшдан кейин аёл организми алоҳида эътиборни талаб этади. Сабаби бу ёшдан менопаузага тайёргарлик бошланади, аёл гормонлари даражаси аста-секин пасаяди. Шу сабабли аёллар 40 ёшдан кейин ўз соғлиғига эҳтиёткорлик билан муносабатда бўлиши ва баъзи мутахассислар томонидан мунтазам равишда профилактика текширувларидан ўтиб бориш мақсадга мувофиқдир. Қуйида 40 ёшдан кейин қайси шифокорларга мурожаат қилиш кераклиги маълум қилинган.
Гинеколог-эндокринолог
Бир йил давомида камида икки маротаба гинекологга мурожаат қилиш зарур. Аммо 40 ёшдан кейин гинеколог-эндокринолог ҳузурига ҳам бориш керак. Шифокор юрак, қон томир тизими касалликларидан ҳимоя қилувчи эстроген ва прогестерон гормонлар даражасини баҳолайди ва саратон касаллигининг олдини олишга ёрдам беради.
Маммолог
Ушбу мутахассис ҳузурига ташриф буюрганда, мамографияни қачондан бошлаш кераклиги ҳақида маълумотга эга бўлиш лозим. Шифокорлар кўкрак бези саратонига чалиниш хавфи юқори бўлмаган аёлларга ушбу муолажани 50 ёшдан кейин ўтказишни маслаҳат беради. Бу, албатта, умумий тавсия. Лекин жараён ҳар ким учун турлича бўлиши мумкин.
Проктолог
Ичак саратони ҳам жуда хавфли бўлиб, у кўпинча 50 ёшдан кейин ривожланади ва дастлабки босқичлари деярли аломатсиз кечади. Шифокорлар менопаузадан кейин аёлларга мунтазам текширувдан ўтишни маслаҳат беради. Чунки организм тўғри ишлаши учун ичак текширувини амалга ошириш зарур.
Офтальмолог
Гарчи кўриш билан боғлиқ муаммолар бўлмаса-да, ҳар йили офтальмологга ташриф буюриш керак. Айниқса, 40 ёшдан кейинги текширувни ўтказиб юбормаслик керак. Бу вақтда қон томир касалликлари, қандли диабет ва юрак касалликлари хавфи ортади. Офтальмолог эса дастлабки босқичларда хавфли аломатларни аниқлаши мумкин.
Кардиолог
Юрак касаллиги хавфи 50 ёшдан кейин жиддий равишда ортади. Менопауза ўтиши туфайли организмда юрак хуружидан ҳимояланадиган эстроген даражаси камаяди. Аммо 40 ёшга келиб ушбу органнинг вазифаси ва соғлиғида кичик ўзгаришлар юз беради ва кейинчалик жиддий бузилишларга ҳам олиб келиши мумкин. Шунинг учун 40 ёшдан кейин юрак электрокардиограммасини мунтазам равишда бажариш, босим даражасини, пульс тезлигини кузатиш, шунингдек, холестерин миқдорини аниқлаб бориш мақсадга мувофиқдир.
Эндокринолог
Айни ёшда учрашиш керак бўлган яна бир мутахассис бу эндокринолог бўлиб, 40 ёшдан кейин аёлларда аутоиммун касаллиги, шунингдек, гипотиреоз ва гипертиреоз ҳам ривожланади.
Изоҳ (0)