Футбол мухлислар учун: «Аякс» чемпионлик совринини эритди, клуб уни 42 минг мухлисга кичик сувенир тариқасида тақдим этади (видео)

Муддатидан аввал Нидерландия чемпионлигини ҳал қилган «Аякс» ўз мухлисларига миннатдорчилик билдиришнинг ўзига хос йўлини топди.

Клуб мавсумий абонементини сотиб олган 42 минг мухлис махсус сувенир (кичик юлдузчалар) билан тақдирланади. Эътиборлиси, «Аякс» 2020/21 йилги мавсумда қўлга киритган соврин эритилган ҳолда сувенирларни ясашда қўлланилган. Ҳар бир сувенирда чемпионлик совринининг 0,06 грамм қисми мавжуд.

Мавсумнинг катта қисмини мухлисларсиз ўтказишга тўғри келди. Аниқроғи томошабинларсиз трибуналарда ҳаракат қилдик. Шунга қарамай биз ҳар ҳафтада сизнинг қўллаб-қувватлашингизни ҳис қилиб турдик: стадионга кетишда, ижтимоий тармоқларда ёки юзма-юз учрашувларда.

Аввалроқ бу соврин сизларники деганда, буни сизлар учун қўлга киритганимизни назарда тутгандик. Бироқ чемпионлик совринининг қисмларга бўлиб берилиши — ўша гапларнинг катта исботи.

Эдвин ван дер Сар, «Аякс» бош директори