Россияда коронавирусга қарши жамоавий иммунитет сентябрда ҳосил бўлиши кутилмоқда

Россия соғлиқни сақлаш вазири Михаил Мурашко COVID-19’га нисбатан жамоавий иммунитет сентябрга келиб шаклланишини маълум қилди, деб ёзади Meduza.

Коронавирусга қарши эмлаш, Мурашконинг сўзларига кўра, режа бўйича бормоқда. Шу билан бирга, у 9 май ҳолати бўйича Россия бўйлаб неча киши эмлангани ҳақида маълумот келтириб ўтмади.

Россияда 18 ёшдан ошган фуқароларни ихтиёрий равишда коронавирусга қарши оммавий эмлаш 18 январдан бошланди.

6 май куни Россия президенти Владимир Путин билан бўлиб ўтган йиғилишда бош вазир ўринбосари Татьяна Голикова Россияда 13,4 миллион киши вакцинанинг битта дозаси, яна 9,4 миллион киши эса иккита дозаси билан тўлиқ эмланганини маълум қилди. Россиянинг жами фуқаролари сони эса 146,2 миллион кишини ташкил қилади (2021 йил 1 январь ҳолатига кўра).

Ўша мажлисда Путин баъзи ҳудудларда эмлаш ва тестдан ўтказиш суръатлари пасаяётганини айтиб, бунга йўл қўймаслик учун эмлаш мумкин бўлган жойларда, шу жумладан, дача посёлкаларида кўчма вакцинация пунктларини ташкил қилишни таклиф этди.

Апрель охирида Bloomberg Россия ҳукуматидаги манбаларига таяниб маълум қилишича, норасмий статистикага кўра, Россияда коронавируснинг учинчи тўлқини бошланган. Мамлакатда коронавирус тарқалишини секинлаштириш учун май ойидаги байрамлар оралиғи дам олиш кунлари деб эълон қилинган эди.

Жамоавий иммунитет — катта қисмида иммунитет пайдо бўлиши шарофати билан, аҳолининг инфекция тарқалишига қарши туриши. Агар инфекциянинг етарли миқдорда таъсирчан нишонлари, яъни иммунитетсиз одамлар бошқа бўлмаса, янги касалланиш ҳолатларининг эҳтимоли камаяди. Шунда жамоавий иммунитетга эришилгани ҳақида айтилади.

Маълумот учун, Ўзбекистонда 9 май ҳолати кўра, жами эмланганлар сони 1 040 074 кишини ташкил этмоқда.