Christie’s аукцион уйи бир йилдан ортиқ Халқаро космик станция (ХКС)да сақланган бир шиша француз виносини кимошди савдосига қўйишни режалаштирмоқда. Бу ҳақда Associated Press нашрига таяниб «Интерфакс» хабар берди.
Савдога 2000 йилнинг Pétrus виноси қўйилади. Бу Space Cargo Unlimited хусусий компанияси томонидан 2019 йилда космосга юборилган 12 та шишадан бири ҳисобланади. Лойиҳа Ердаги ўсимликларнинг иқлим ўзгариши ва касалликларга чидамли бўлишига ёрдам беришга қаратилган. Бундан ташқари, тадқиқотчилар винонинг тайёр бўлиши, ферментация жараёни ва пуфаклар ҳосил бўлиш жараёнини яхшироқ тушунишни мақсад қилиб қўйган эди.
Вино 14 ой ўтиб Ерга қайтарилган ва ичимликни таътиб кўрган мутахассислар винонинг таъми бироз ўзгарганини таъкидлади. Christie’s аукцион уйининг маълум қилишича, Pétrus ноёб тортишиш муҳитида қиёмига етган.
Аввал бундай винонинг бир шишаси 10 минг долларга баҳоланган эди. Pétrus виноси ўзининг мураккаб, танин таъмига ва гилос ҳидига бойлиги билан танилган.
Март ойида франциялик мутахассислар космосда бўлиб қайтган ва Ерда қолган виноларни бир-бири билан солиштириш имконига эга бўлди. Уларнинг фикрига кўра, таъмида бироз ўзгариш бўлганига қарамай, улар орасидаги тафовутни аниқ айтиш қийин. Таъкидланишича, Ерда қолган шаробнинг таъми янгироқ, «космик версия» эса юмшоқроқ ва хушбўйроқ экани аниқланган.
Шунингдек, харидор ўша йилга тааллуқли Pétrus шаробининг «Ердаги версияси», декантер, стаканлар ва метеоритдан тайёрланган штопорга ҳам эга бўлади.
https://www.instagram.com/p/COSvx4sFlvT/?utm_source=ig_embed
Аукциондан тушган пуллар Space Cargo Unlimited’нинг келажакдаги лойиҳаларини молиялаштириш учун йўналтирилади. Қолган шишалар очилмайди, ҳозирча уларни сотиш режалаштирилмаган.
Аввалроқ Twitter асосчиси Жек Дорси биринчи твитидан йиғилган пулни GiveDirectly фондининг Африкадаги кам таъминланган оилаларга ёрдам кўрсатувчи Africa Response дастурига йўналтиришини айтган эди. Twitter раҳбарининг илк хабари учун таклиф қилинган энг катта нарх 2,5 миллион долларга етган.
АҚШнинг Нью-Йорк шаҳрида Injective Protocol блокчейн компанияси 95 000 долларга кўча рассоми Бэнксининг 2007 йилда чизилган «Morons (White)» суратини сотиб олди ва уни ёқиб юборди.
Изоҳ (0)