Европа Комиссияси COVID-19’га қарши Европа Дори-дармон Агентлиги (EМА) томонидан тасдиқланган вакциналардан бири билан эмланган чет эллик сайёҳларни Европа Иттифоқига киришга рухсат беришни таклиф қилмоқда. Бу ҳақда Meduza хабар берди.
Шунингдек, Жаҳон соғлиқни сақлаш ташкилоти (ЖССТ) фавқулодда вазиятларда фойдаланишга рухсат берган вакциналар билан эмланганларга ҳам ваколат бериш таклиф этилмоқда.
Қайд этилишича, чет элликлар вакцинани Евроиттифоққа келишидан камида 14 кун олдин қабул қилиши шарт. Шунингдек, улар эмлангани тўғрисида Иттифоққа аъзо давлатлар томонидан берилган рақамли сертификат ёки ҳамжамиятга аъзо давлатларда тан олинган бошқа сертификат билан тасдиқлатиши керак.
Эмлаш мумкин бўлмаган ёшдаги болалар, агар келишидан 72 соат олдин топширган коронавирус тести салбий чиқса, эмланган ота-оналари билан ҳудудга кириши мумкин. Европа комиссиясининг тавсиялари кучга кириши учун улар Иттифоқ Кенгашидаги барча аъзо мамлакатлар томонидан тасдиқланиши керак. Тавсияларнинг биринчи муҳокамаси ҳамжамиятда 5 май куни бўлиб ўтади.
Айни пайтда фақат ижобий эпидемиологик вазиятга эга давлатлар фуқароларигина Иттифоқнинг аксарият мамлакатларига ихтиёрий саёҳат қилиши мумкин. Европа Иттифоқи рўйхатида ҳозирча фақат еттита шундай давлат бор.
EМА Иттифоқ ҳудудида коронавирусга қарши AstraZeneca, Pfizer, Moderna ва Johnson & Johnson компанияларининг вакциналардан фойдаланишга рухсат берган. ЖССТ ҳам ушбу вакциналарни тасдиқлаган.
Март ойида агентлик Россиянинг «Спутник V» вакцинасини текширишни бошлади. Шу билан бирга, EМА ва Европа Комиссияси ушбу дори Европа Иттифоқига керак эмаслиги ва унинг хавфли бўлиши мумкинлиги тўғрисида фикр билдирди. «Спутник V» яратувчилари Европа функционерларини нохолисликда айблади.
Изоҳ (0)