28 апрель куни россиялик блогер ва сайёҳ Костя Ткачев Қарши яқинидаги улкан ҳудуд кўп йиллар давомида полиэтилен пакетлар ва бошқа маиший чиқиндилар тўлиб кетгани ҳақида видеороликни эълон қилди. Шундан сўнг ушбу ҳудудни чиқиндилардан тозалаш ишлари бошланди, дея хабар қилмоқда «Gazeta.uz».
Аниқланишича, чиқиндиларни шаҳар чиқиндихонасидан шамол учириб келган, шунингдек, машиналарда ўтиб кетаётган одамлар ҳам ташлаган.
«Ушбу томоша кўпроқ замонавий рассомнинг қандайдир даҳшатли инсталляциясига ўхшайди. Ушбу манзара мени жуда ҳайратга солди, қўрқитди, мен бир кундан кўпроқ вақт давомида бу жой ҳақида ўйламасдан туролмадим», – дейди блогер.
«У ерда бўлганимнинг биринчи дақиқасиданоқ, агар мен шунчаки бу ердан ўтиб кетсам ва ҳеч бўлмаганда бирор нарса қилишга уринмасам, ўзимни кечирмаслигимни англадим. Ушбу пакетларнинг ҳаммасини йиғиб олиш ҳаракатига тушдим», – дейди у.
Бир кунда тўртта катта қоп чиқинди йиғиб олган Костя Ткачев бутун ҳудудни тозалаш учун бир кишига 110 кун кераклигини ҳисоблаб чиқди.
Блогер атрофни тозалашга танишларни жалб қилишга уринди, аммо бу натижа бермади. Тошкентга қайтиб келгач, сайёҳлик компанияси раҳбари Ойбек унинг ташаббуси ҳақида хабардор бўлди, у инглиз тили ўқитувчиси Шамил билан биргаликда тозалаш учун Қаршига боришга рози бўлди.
Қаршида улар ҳудудни тозалашда иштирок этишга рози бўлган йигитларни топишга муваффақ бўлди. Икки кундан камроқ вақт ичида жами 14 киши бутун ифлосланган майдоннинг тахминан тўртдан бир қисмидан чиқиндиларни йиғишди. Улар чиқиндиларни қайта ишлаш заводига олиб борди.
Костя Ткачев акцияни ҳаётидаги энг муҳим воқеа деб атади. У ўзига ҳамфикрларнинг ҳаракатлари «занжир реакциясини бошлашига» умид билдирди.
1 май куни Экология ва атроф-муҳитни муҳофаза қилиш давлат қўмитаси ҳудудларни экология ва ободонлаштириш бошқармалари, шунингдек, «Тоза ҳудуд» корхонаси ва «Эко Транс» компанияси ҳудудни чиқиндидан тозалаш учун ҳашар бошлаганини хабар қилди. Вазият бўйича Ўзбекистон Экологик партияси ҳам ўз хавотирини билдирди.
Қўмита маълумотларига кўра, Чироқчи туманига тегишли ифлосланган ҳудуднинг майдони 17 гектарни ташкил этади. Тозалаш ишларига 200 дан ортиқ одам ва 10 та махсус техника, шу жумладан, бульдозер жалб қилинган.
Маълум қилинишича, «Эко Транс» компанияси ҳудуднинг тозалигини назорат қилиши керак бўлган. Шу сабаб ушбу компаниянинг мансабдор шахси маъмурий жавобгарликка тортилди.
Бундан ташқари, вилоятда юк машиналари томонидан ноқонуний чиқинди ташланишининг олдини олиш устидан назорат кучайтирилгани қайд этилган.
Изоҳ (0)