Англия Премьер Лигасининг 34-туридан ўрин олган «Манчестер Юнайтед» ва «Ливерпуль» ўртасидаги учрашув бугун, 2 май куни бўлиб ўтмайди.
Премьер Лига учрашувнинг бошқа куни бўлиб ўтишини маълум қилди. Ўйиннинг янги санаси ҳали эълон қилинмади.
Бунга стадион ва унинг атрофида юзага келган тартибсизликлар сабаб бўлди. Аввалроқ «Манчестер Юнайтед» мухлисларининг клуб хўжайинларига қарши норозилик намойишларини ўтказаётгани учун учрашувнинг номаълум муддатга қолдирилгани ҳақида хабар берилганди. Мухлислар стадион атрофидаги барча кўчаларни тўсиб қўйган.
33-турдан кейин «Манчестер Юнайтед» 67 очко билан мусобақа жадвалида 2-ўринни эгаллаб турибди, жамоа пешқадам «Манчестер Сити»дан 13 очкога ортда қолмоқда. «Ливерпуль» эса 54 очко билан 6-поғонани банд этган. Агар мазкур учрашувда «Ливерпуль» ғалаба қозонганида, «Сити» чемпионликни тантана қилган бўларди.
Изоҳ (0)