Samsung Galaxy Z Fold қон босими ва холестерин миқдорини ўлчашни ўрганиб олади
Samsung Electronics компанияси «Букланадиган электрон қурилма ва унинг ёрдамида биомаълумотларни баҳолаш усули» номли патентни 2020 йилнинг апрелида АҚШ Патент ва товар белгилари идораси (USPTO) ҳамда Бутунжаҳон интеллектуал мулк ташкилотига (WIPO) топширган эди. Ҳужжатлар 2021 йилнинг 25 мартида тасдиқланган ва эълон қилинган, деб хабар беради IXBT.
Патентдаги тасвирни ифодалашда Galaxy Fold услубидаги смартфондан фойдаланилган бўлиб, у тенг икки қисмга буклана олади. Изоҳда қайд этилишича, ушбу технологиядан, шунингдек, Galaxy Z Flip’да ҳам фойдаланиш мумкин.
Экраннинг пасти қисмидаги эгилувчан экранда иккита тасвир датчиги жойлашган. Кўрсаткич бармоқни датчиклардан бири ёки иккаласига қўйиш орқали турли маълумотларни олиш мумкин, масалан, юрак уриши ёки артериал босим. Бундан ташқари, уйқу артериясининг ҳолатини текшириш ва холестирин миқдори ҳақида маълумотларни олса бўлади. Шу билан бирга, қурилма артериялар деворларининг қаттиқлиги, стресс ва чарчоқ даражасини баҳолашга қодир.
Samsung, шунингдек, муқобил вариант сифатида датчикларни қурилманинг ташқи томонига жойлаштириши мумкин. Ўлчаш кафтни унга босиш орқали амалга оширилади. Бундан ташқари, қуйидаги суратда кўрсатилганидек қуриланинг икки учидан ушлаш орқали ҳам ушбу амални бажариш мумкин.
Ўлчашдаги аниқликни таъминлаш мақсадида Samsung фойдаланувчининг жинси, оғирлиги ва тана массасининг индексини ҳисобга олади. Шунингдек, ҳаво ҳарорати ва намлик борасидаги маълумотларни олиш учун атроф-муҳитдаги вазият ҳам ўлчанади. Шундан сўнг, фойдаланувчи ўз соғлиғи борасидаги маълумотларга эга бўлади.
Аввалроқ Samsung компанияси квант ҳимояга эга Galaxy Quantum 2 смартфонини тақдим этгани тўғрисида хабар берилганди.
