ЖССТ Ҳиндистонда COVID-19 авж олишининг сабабини маълум қилди
Жаҳон соғлиқни сақлаш ташкилоти (ЖССТ) Ҳиндистонда коронавирус тарқалишининг авж олишига оммавий йиғинлар, эмлаш суръатининг пастлиги ҳамда вируснинг юқумлироқ штаммлари сабаб бўлаётганини айтди. Бу ҳақда «Korrespondent.net» хабар берди.
ЖССТ вакили Тарик Яшаревичнинг сўзларига кўра, вируснинг юқумлироқ штаммлари мамлакатда касаллик авж олишига ягона сабаб эмас.
«Ушбу янги мутациялар касалланиш даражасининг кескин ошишига қай даражада ёрдам бераётгани номаълум бўлиб қолмоқда, чунки вазиятнинг ёмонлашувига бошқа омиллар, масалан, яқинда бўлиб ўтган катта оммавий йиғинлар ҳам ҳисса қўшмоқда», — деди у
Қайд этилишича, мамлакат соғлиқни сақлаш тизими қўшимча босим остида қолган, чунки одамлар уйда даволаниш мумкинлигига қарамай ваҳима ичида касалхоналарга юборилган.
Ҳиндистонда коронавируснинг қўшмутацияли B1617 штамми аниқланган эди. Мазкур штамм одатдагидан кўра юқумлироқ ҳисобланади.
Жаҳон соғлиқни сақлаш ташкилоти (ЖССТ) Ҳиндистонда тобора ортиб бораётган коронавирусга чалиниш ҳолатларига қарши курашда ёрдам учун мамлакатга 2,6 мингдан ортиқ ходимини юборди.
Шунингдек, АҚШ Ҳиндистонга дори-дармон ва коронавирусни аниқловчи тезкор тестлар ҳамда вакцина ишлаб чиқариш учун хом ашё етказиб бермоқчи.
Ўз навбатида Европа комиссияси раҳбари Урсула фон дер Ляйен Европа Иттифоқи мисли кўрилмаган COVID-19 тўлқинини бошдан кечираётган Ҳиндистонга дарҳол ёрдам беришга тайёрлигини айтди.
27 апрель куни Россия тўғридан-тўғри инвестиция фонди раҳбари Кирилл Дмитриев Ҳиндистон май ойининг бошида «Спутник V» вакцинасининг биринчи партиясини олишини айтди.
Коронавирус билан касалланиш кўпайгани сабабли Ҳиндистонда оғир эпидемиологик вазият мавжуд. Сўнгги бир неча кун ичида мамлакатда COVID-19 билан касалланганлар сони бўйича кетма-кет антирекордлар қайд этилмоқда.
Ҳиндистон аҳолиси уйида ҳам тиббий ниқобларини тақишга чақирилмоқда, айниқса, оилада коронавирус билан касалланган бемор бўлса.
