«Меҳр ва оқибат» ҳайвонларни ҳимоя қилиш жамияти вилоятлар ветеринарларини Тошкентдаги хусусий клиникаларда бошпанасиз ит ва мушукларни стерилизация ҳамда кастрация қилиш (бичиш) бўйича ўқитиш лойиҳасини ишга туширди.
Бошпанасиз ҳайвонлар сонини инсонпарварлик йўли билан камайтириш дастурини амалга оширишда уларни стерилизация ва кастрация қилиш назарда тутилган. Бироқ ҳайвон ҳимоячилари мамлакатнинг кўплаб туманларида ушбу операцияни амалга ошира оладиган ветеринарлар йўқлигига оид муаммога дуч келди.
«Шу сабабли кўпайишга мўлжалланмаган ҳайвонларни мажбурий стерилизация қилиш ҳақида ҳали гапира олмаймиз. Бу узоқ жараён ва давлат ёрдамисиз уддалай олмаймиз», — дейилади хабарда.
«Меҳр ва оқибат» лойиҳасини Ўзбекистон Ветеринария ва чорвачиликни ривожлантириш давлат қўмитаси, Тошкент давлат аграр университети ҳамда Тошкент вилояти Ветеринария бошқармаси қўллаб-қувватлаган. Дастлабки иккита муассаса томонидан ҳозирда ҳамкорлик меморандуми тайёрланмоқда, учинчиси билан ҳужжат имзолаб бўлинган.
Лойиҳанинг биринчи босқичида Тошкент вилоятидаги ветеринарлар пойтахтдаги «Доктор Вет», «Лига Вет», Doctor & Animals, «Импурлс» ва «Доктор Айболит» хусусий ветеринария клиникаларида стерилизацияни ўрганади.
Изоҳ (0)