Бугун,

  • USD 11095.31
  • RUB 173.84
  • EUR 10772.44

Қашқадарё вилоятида ИИБ биносидан жасади чиққан марҳум Юсуф Абдураҳмонов ўлимида айбланган яна 2 нафар ИИБ ходими уч йил муддатга озодликдан маҳрум қилинди. Бу ҳақда «Дарё» манбаси хабар берди.

Таъкидланишича, Жиноят ишлари бўйича Ғузор туман судида кўриб чиқилган жиноят ишида ИИБ ходимлари — Ж.Р. ва Р.К. Жиноят кодексининг 234-моддаси (қонунга хилоф равишда ушлаб туриш ёки ҳибсга олиш) ва 235-моддаси (қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) билан айбли деб топилган.

«Қамалганларнинг бири жиноят қидирув бўлими ходими бўлса, яна бири профилактика инспектори ҳисобланади. Уларнинг ҳар бирига уч йилдан озодликдан маҳрум қилиш жазоси тайинланди», — дейди «Дарё» мухбири билан суҳбатлашган манба.

«Дарё» манбаси берган маълумотга аниқлик киритиш мақсадида Қашқадарё вилоят судининг ОАВлар билан ишловчи масъули Фарҳод Тиловов билан боғландик. Вазиятга аниқлик киритган масъул ҳақиқатдан ҳам жиноят ишлари бўйича Ғузор туман судида «Чироқчи воқеа»си айбдорларига ҳукм ўқилганини, бироқ ҳукм эълон қилинганидан сўнг ўтиши лозим бўлган муддат тугамаганлиги учун маълумотни очиқлай олмаслигини билдирди.

Эслатиб ўтамиз, туман ИИБда қийноққа солинган 32 ёшли Юсуф Абдураҳмонов ўлими жамоатчиликка маълум бўлгач, «Дарё» мухбири билан суҳбатлашган Қурбон Остоноев «Нурбек исмли ходимдан сўнг ёнимга Анвар дегани келди. У ҳам ҳақорат қилди, урди. Жавобларим маъқул келмадими, ‘противогаз’ кийдириб, қийноққа сола бошлади. Худди ёш боладек чаккамга тарсаки туширарди. Ўша куни хона бурчагида қўлимни кўтартириб, турғизиб ҳам қўйишди. Ўзлари эса ухлади», деганди.

Таъкидлаш лозим, «Чироқчи воқеаси»да дастлаб икки нафар ИИБ ходими қўлга олингани хабар берилганди. Кейинчалик эса аёвсиз калтакланган ота-болага терговчилар томонидан 60 га яқин ИИБ ходимининг сурати кўрсатилган. Ота-бола кўрсатилган расмлардаги ИИБ ходимларининг 13 нафарини таниган. Шундан сўнг вилоят прокуратурасидан Илҳом исмли терговчи марҳумнинг акаси Шуҳрат Абдураҳмоновга укасининг ўлими бўйича 13 нафар ИИБ ходими терговга жалб қилинишини билдирганди. Воқеа сабаб Қашқадарё вилоят ИИБ бошлиғи ўринбосари Самад Турдиев виждони қийналгани боис ишдан кетганди.«Чироқчи воқеаси» айбдорлари ишини кўриб чиққан Олий суд судьяси Камолиддин Толлибоев раислигидаги судлов ҳайъати марҳум Юсуф Абдураҳмонов ўлимида айбланганлар — Чироқчи тумани ИИО ФМБ 4-сонли ИИБ бошлиғи лавозимида ишлаган Нурбек Овлаевни 2 йил 6 ой ИИБ тизимида ҳамда бошқа мансабдорлик вазифаларида ишлаш ҳуқуқидан маҳрум қилиб, 9 йилга озодликдан маҳрум қилганди. Чироқчи тумани ИИО ФМБ 4-сонли ИИБ жиноят қидирув гуруҳи тезкор вакили лавозимида ишлаган Анвар Жонқобиловни эса 2 йил ИИБда ҳамда бошқа мансабдорлик вазифаларида ишлаш ҳуқуқидан маҳрум қилиб, 8 йил 6 ойга қамаганди. Чироқчи тумани ИИО ФМБ 4-сонли ИИБ профилактика инспектори лавозимида ишлаган Шерзод Раҳмонов эса 2 йил ИИБда ҳамда бошқа мансабдорлик вазифаларида ишлаш ҳуқуқидан маҳрум қилиниб, унга 6 йил озодликдан маҳрум қилиш жазоси тайинланганди. Профилактика инспектори Адҳам Тожиноров ҳам 2 йил ИИБда ҳамда бошқа мансабдорлик вазифаларида ишлаш ҳуқуқидан маҳрум қилиниб, 5 йил 6 ойга озодликдан маҳрум қилинганди.

Чироқчи тумани ИИО ФМБ 4-сонли ИИБ жиноят қидирув гуруҳи тезкор вакили лавозимида ишлаган Бобурмирзо Ғайратовга эса 2 йил ИИБда ҳамда бошқа мансабдорлик вазифаларида ишлаш ҳуқуқидан маҳрум қилиниб, 4 йил озодликни чеклаш жазоси тайинланганди.

Изоҳ
Асосий янгиликлар
Маданият
Малика Диананинг кўйлаги Sotheby’s аукционида рекорд нархга сотилди
Молия
Ўзбекистондаги энг фаол банклар рейтинги янгиланди. Нималар ўзгарди?
Дунё
Покистонда масжиддаги портлаш қурбонлари сони қарийб 60 кишига етди (фото)