“Chiroqchi voqeasi” bo‘yicha yana 2 nafar IIB xodimi 3 yil muddatga ozodlikdan mahrum qilingani aytilmoqda

Qashqadaryo viloyatida IIB binosidan jasadi chiqqan marhum Yusuf Abdurahmonov o‘limida ayblangan yana 2 nafar IIB xodimi uch yil muddatga ozodlikdan mahrum qilindi. Bu haqda “Daryo” manbasi xabar berdi.

Ta’kidlanishicha, Jinoyat ishlari bo‘yicha G‘uzor tuman sudida ko‘rib chiqilgan jinoyat ishida IIB xodimlari — J.R. va R.K. Jinoyat kodeksining 234-moddasi (qonunga xilof ravishda ushlab turish yoki hibsga olish) va 235-moddasi (qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash) bilan aybli deb topilgan.

“Qamalganlarning biri jinoyat qidiruv bo‘limi xodimi bo‘lsa, yana biri profilaktika inspektori hisoblanadi. Ularning har biriga uch yildan ozodlikdan mahrum qilish jazosi tayinlandi”, — deydi “Daryo” muxbiri bilan suhbatlashgan manba.

“Daryo” manbasi bergan ma’lumotga aniqlik kiritish maqsadida Qashqadaryo viloyat sudining OAVlar bilan ishlovchi mas’uli Farhod Tilovov bilan bog‘landik. Vaziyatga aniqlik kiritgan mas’ul haqiqatdan ham jinoyat ishlari bo‘yicha G‘uzor tuman sudida “Chiroqchi voqea”si aybdorlariga hukm o‘qilganini, biroq hukm e’lon qilinganidan so‘ng o‘tishi lozim bo‘lgan muddat tugamaganligi uchun ma’lumotni ochiqlay olmasligini bildirdi.

Eslatib o‘tamiz, tuman IIBda qiynoqqa solingan 32 yoshli Yusuf Abdurahmonov o‘limi jamoatchilikka ma’lum bo‘lgach, “Daryo” muxbiri bilan suhbatlashgan Qurbon Ostonoyev “Nurbek ismli xodimdan so‘ng yonimga Anvar degani keldi. U ham haqorat qildi, urdi. Javoblarim ma’qul kelmadimi, ‘protivogaz’ kiydirib, qiynoqqa sola boshladi. Xuddi yosh boladek chakkamga tarsaki tushirardi. O‘sha kuni xona burchagida qo‘limni ko‘tartirib, turg‘izib ham qo‘yishdi. O‘zlari esa uxladi”, degandi.

Ta’kidlash lozim, “Chiroqchi voqeasi”da dastlab ikki nafar IIB xodimi qo‘lga olingani xabar berilgandi. Keyinchalik esa ayovsiz kaltaklangan ota-bolaga tergovchilar tomonidan 60 ga yaqin IIB xodimining surati ko‘rsatilgan. Ota-bola ko‘rsatilgan rasmlardagi IIB xodimlarining 13 nafarini tanigan. Shundan so‘ng viloyat prokuraturasidan Ilhom ismli tergovchi marhumning akasi Shuhrat Abdurahmonovga ukasining o‘limi bo‘yicha 13 nafar IIB xodimi tergovga jalb qilinishini bildirgandi. Voqea sabab Qashqadaryo viloyat IIB boshlig‘i o‘rinbosari Samad Turdiyev vijdoni qiynalgani bois ishdan ketgandi.“Chiroqchi voqeasi” aybdorlari ishini ko‘rib chiqqan Oliy sud sudyasi Kamoliddin Tolliboyev raisligidagi sudlov hay’ati marhum Yusuf Abdurahmonov o‘limida ayblanganlar — Chiroqchi tumani IIO FMB 4-sonli IIB boshlig‘i lavozimida ishlagan Nurbek Ovlayevni 2 yil 6 oy IIB tizimida hamda boshqa mansabdorlik vazifalarida ishlash huquqidan mahrum qilib, 9 yilga ozodlikdan mahrum qilgandi. Chiroqchi tumani IIO FMB 4-sonli IIB jinoyat qidiruv guruhi tezkor vakili lavozimida ishlagan Anvar Jonqobilovni esa 2 yil IIBda hamda boshqa mansabdorlik vazifalarida ishlash huquqidan mahrum qilib, 8 yil 6 oyga qamagandi. Chiroqchi tumani IIO FMB 4-sonli IIB profilaktika inspektori lavozimida ishlagan Sherzod Rahmonov esa 2 yil IIBda hamda boshqa mansabdorlik vazifalarida ishlash huquqidan mahrum qilinib, unga 6 yil ozodlikdan mahrum qilish jazosi tayinlangandi. Profilaktika inspektori Adham Tojinorov ham 2 yil IIBda hamda boshqa mansabdorlik vazifalarida ishlash huquqidan mahrum qilinib, 5 yil 6 oyga ozodlikdan mahrum qilingandi.

Chiroqchi tumani IIO FMB 4-sonli IIB jinoyat qidiruv guruhi tezkor vakili lavozimida ishlagan Boburmirzo G‘ayratovga esa 2 yil IIBda hamda boshqa mansabdorlik vazifalarida ishlash huquqidan mahrum qilinib, 4 yil ozodlikni cheklash jazosi tayinlangandi.