26 апрель куни ижтимоий тармоқларда аҳоли гавжум ҳудудларда ёнғин ўчириш машиналари томонидан одамларнинг устига сув сепилаётгани акс этган видеолар тарқалди. Уларнинг бирида ўт ўчириш машинаси одамлар бўлган савдо расталари ора сув сепаётгани, одамларнинг бақириб қочгани, иккинчисида эса тротуарда турган машиналар устига юқори босимда суюқлик сепаётгани акс этган.
ФВВ матбуот хизмати ҳолат Андижон вилояти Марҳамат тумани ҳамда Сурхондарё вилояти Денов туманларида юзага келганини маълум қилди.
Унга кўра, юқорида қайд этилган ҳудудларда коронавирус инфекциясининг ўчоғи аниқланган ҳамда вирус тарқалишининг олдини олиш мақсадида, дезинфекция ишлари шошилинч, тартибсиз ҳолда амалга оширилган. Ҳодиса юзасидан ўрганиш якунлари бўйича тегишли ходимларга интизомий таъзир чоралари кўрилиши қайд этилган.
Эслатиб ўтамиз, 2020 йилнинг сентябрида Соғлиқни сақлаш вазирлиги дезинфекция туннеллари коронавирусга қарши курашда энг фойдасиз чора эканлигини маълум қилганди. Шу сабабли Коронавирусга қарши кураш бўйича Республика махсус комиссияси қарори билан бинолар ва бошқа объектларга киришда дезинфекция туннелларидан фойдаланиш тақиқланганди. Бу каби қарор Жаҳон соғлиқни сақлаш ташкилоти тавсияси асосида қабул қилинган.
Изоҳ (0)