Хонанда ва актриса Феруза Каримова «Women» YouTube каналига берган интервьюсида ўзидан 12 ёш катта продюсери Бахтиёр Фаттоҳовга турмушга чиққанида турли хил туҳмат ва бўхтонлар гирдобида қолгани ҳақида сўзлаб берди.
«2014 йил турмуш ўртоғим билан кўришиб қолиб, 2015 йил ижод бошланди. 2016 йил ‘Дастингдан’ қўшиғим чиқди. Кейин уларда менга нисбатан илиқлик пайдо бўлган. Лекин мен эътибор бермаганман. Продюсерми продюсер, ишми иш, бўлган у пайтда. Улар ўша пайтда биринчи оиласидан ажрашган бўлган. Иш пайтида биз билан кўришиб турардилар, суҳбатлашардилар. Қарасам, яхши инсон, меҳрибон, менга эътиборли. Ҳаёти ҳақида ҳам гапириб берардилар. Мени секин-секин кўниктириб, ўзига ўргатиб, топ этиб, узук олиб келиб, қараб турибдилар: ‘Менга турмушга чиқасизми?’ деб. Бир йил ишладим, характерларини кўрдим, мендаям уларга нисбатан меҳр пайдо бўлди. Турмуш ўртоғимни яхши кўраман, ҳурмат қиламан. Ҳар доим ҳар тарафлама қўллаб-қувватлаб келганлар», — дейди Феруза Каримова турмуш ўртоғи билан қандай танишгани ҳақида гапирар экан.
Шунингдек, хонанда продюсерига турмушга чиқишдан олдин ҳаёлидан қандай ўйлар ўтгани ҳақида ҳам сўзлаб берди.
«Хаёлимдан кўп нарса ўтди. Мен турмушга чиқмаганман, қиз бола бошим билан ижод бошлаганман. Улар мендан 12 ёшга катта. Менинг биринчи турмушим, уларнинг эса иккинчи турмушлари. Асосий қийнаган нарса шу бўлган. Озми, кўпми ижод қилиб қўйдим. Мухлисларим кўнглидан озгина бўлса ҳам жой олдик. Мен ҳақимда мухлислар қандай фикр билдириши мумкин. Ўзидан каттага тегибди ёки... Кўп нарса эшитдимда, тўғриси. Оиласини ажратворибди, ўз фарзандларини ҳам ташлаб, шу қизга уйланибди. Хотинини ташлаб кетибди шу қизни деб, деган жуда кўп гапларни эшитдик, лекин менинг кўнглим оғриди мухлислардан. Мени билмаган мухлислардан. Лекин санъаткор кўзи кўр, қулоғи кар бўлиши керак-да. Худо бор, бир куни ҳаммаси ўртага чиқади, ўшанда билишади, дедим. Менинг ҳеч қанақа дахлим бўлмаган. Фақат ўйлаганманки, кейинги ҳаётим нима бўлади, орамиздаги фарқни ўйлаганман, ижодни ҳам ўйлаганман. Қарасам, соҳани тушунадилар, санъатни севадилар, бошқача назар билан қарамайдилар. Майли, Аллоҳга таваккал, деб турмушга чиққанман. Лекин меҳрим бўлган», — дейди хонанда.
Феруза Каримова онаси ва яқинлари томонидан қаршиликлар бўлганини ҳам яширмади.
«Турмушга чиқаётганимда онам қаршилик қилган. ‘Тенгинг топилади’, дейишган, тенгим топилган. У менга эрлик қила олмасди. Менинг ҳисобимга яшарди. Мени уларнинг ўтмиши қизиқтирмайди. Менга уларнинг мени деб яшаб бошлаганларидан кейинги ҳаёти қизиқ. Мен ўзим тенги болага турмушга чиқиб, бир ой яшаб, бир-биримизни тушунмай ажрашиб кетиб, ‘Ана, номига турмушга чиқиб олди. Санъаткор-да, битта болани бахтсиз қилди’, дегандан, иккинчи марта уйланаётган каттароқ ёшли инсонни бахтли қилганим яхшироқ. Одамларнинг гапи майли. Мен ҳеч кимга жавоб бермайман. Аллоҳга жавоб бераман фақат», — дейди хонанда.
Хонанданинг айтишича, Умра сафарига боришни ҳамда ундан сўнг санъатни бутунлай тарк этишни ният қилган.
Изоҳ (0)