Уэльс терма жамоаси бош мураббийи ва «Манчестер Юнайтед» собиқ ярим ҳимоячиси Райан Гиггзга нисбатан жиноий иш қўзғатилди. Бу ҳақда Буюк Британия прокуратураси матбуот хизматига таяниб, Sky Sports хабар қилди.
Гиггз 2020 йилнинг ноябрида Уорслидаги уйида собиқ қайлиғи Кейт Гревиллга тан жароҳати етказганликда айбланмоқда. Шунингдек, собиқ футболчи ўша воқеа пайтида 20 ёшли қизга ҳам ҳужум қилгани айтилмоқда.
Бундан ташқари Гиггз собиқ севгилисини 2017 йилнинг декабридан 2020 йил ноябрига қадар мажбурлаб ушлаб туриш ва назорат қилишда айбланган.
Гиггз гаров эвазига озодликка чиқарилган, унинг иши судда 28 апрель куни кўриб чиқилади.
Ушбу ҳолат юзасидан Уэльс футбол ассоциацияси мутахассисни терма жамоа бош мураббийлигидан вақтинча четлатди. Райан Евро—2020 мусобақасида терма жамоа билан бирга иштирок эта олмайди.
Гиггзнинг ўзи ушбу айбловларни буткул инкор қилмоқда ва ўз номини оқлаб олиш ҳаракатида эканини маълум қилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)