Медведев Россия ва АҚШ муносабатлари Совуқ уруш даврига қайтганини айтди

Москва ва Вашингтон ўртасидаги муносабатлар Совуқ уруш даврига қайтди. Бу ҳақда Россия Хавфсизлик Кенгаши раисининг ўринбосари Дмитрий Медведев айтиб ўтди, деб ёзади «РБК».

«Сўнгги йилларда Россия ва АҚШ ўртасидаги муносабатлар рақобатдан қарама-қаршиликка ўтиб, аслида, Совуқ уруш даврига қайтди. Санкциялар босими, таҳдидлар, қарама-қаршиликлар, ўз худбин манфаатларини ҳимоя қилиш — буларнинг барчаси дунёни доимий беқарорлик ҳолатига олиб келади», — деди Медведев.

Унинг фикрига кўра, Россия бугунги кунда ҳам собиқ иттифоқ давридаги каби, «рақибига таҳдид бўйича АҚШ билан кимўзар ҳолатида». Медведев 1962 йилдаги Кариб денгизи инқирозини эслаб, ўшанда вазиятни ҳар икки мамлакат раҳбарлари сақлаб қолгани, улар ҳушёрлик билан баҳо бериб, «муросага эришишда донолик кераклигини» тан олганини айтди.

«СССР ва АҚШ ўртасида тенг ҳуқуқли мулоқот мавжуд эди, у таҳдидлар ва ультиматумлар тили билан амалга оширилмасди», — деди Медведев.

Москва ва Вашингтон ўртасидаги муносабатларнинг кескинлашуви сўнгги марта 15 апрель куни, Америка президенти Жо Байден Россияга нисбатан янги санкциялар киритганидан кейин юз берди. Янги санкциялар Россиянинг АҚШдаги 2020 йилги президентлик сайловларига аралашиши, АҚШ ҳукумат идораларига қилинган киберҳужум ва Россиянинг Афғонистондаги америкаликларга қарши «Толибон» жангарилари билан тил бириктиргани билан боғлиқ. Оқ уй февраль ойида Россиянинг ушбу ҳаракатлари учун АҚШ расмийлари унга қарши санкциялар режалаштираётганини айтганди.

Шунингдек, АҚШ мамлакатдан 10 нафар россиялик дипломат чиқариб юборилиши ҳақида эълон қилди. Польша АҚШнинг Россияга қарши санкцияларини қўллаб-қувватлади. Польша Варшавадаги уч нафар россиялик дипломатни persona non grata деб эълон қилди, улар мамлакатдан чиқариб юборилади. Россия Ташқи ишлар вазирлиги бунга худди шу тарзда жавоб қилишини маълум қилди.

16 апрель куни Россия президентнинг ёрдамчиси АҚШ элчиси Жон Салливанга маслаҳат учун Вашингтонга қайтиб кетишини тавсия қилди. Жон Салливан Кремлнинг тавсияларига қарамай, мамлакатни тарк этишдан бош тортди. Аммо кейинроқ Axios нашри Давлат департаменти вакилига таяниб, АҚШнинг Россиядаги элчиси Жон Салливан шу ҳафта Вашингтонга жўнаб кетиб, у ерда бир неча ҳафта туриши, сўнг эса яна қайтиб келишини маълум қилди.