Американинг Apple корпорацияси баҳорги катта тақдимоти доирасида ингичка корпус ва М1 процессорига эга янги iMac компьютерларини тақдим этди. Тақдимот 20 апрель куни компаниянинг YouTube’даги расмий канали орқали амалга оширилган.
Қурилма қалинлиги 11,5 миллиметрни ташкил этади. Кумуш рангига яна олти хил ранг қўшилган: сариқ, коралл, қизил, бинафша, яшил ва кўк. iMac 24 дюймли 4,5К-дисплей, FaceTime HD-камера, овоз студиясига хос микрофон ва олтида динамикдан иборат овоз тизимига эга бўлган.
Шунингдек, компьютерларда биринчи бор Touch ID функцияси пайдо бўлган, масалан, тўловлар авторизациясини бармоқ изи ёрдамида амалга оширса бўлади. У Apple клавиартурасига ўрнатилган бўлиб, уни ҳам янги iMac’лар рангига мос равишда харид қилиш мумкин.
Янги iMac компаниясининг ўзини процессорига эга бўлган биринчи моноблокка айланди. Бунга қадар M1 MacBook Air, MacBook Pro ва Mac Mini’га ўрнатилган. Моноблок тўрт хил рангда 1299 доллар қийматида сотувга чиқади, етти хил рангли ва қўшимча опцияларга эга версиясини эса 1499 доллардан харид қилиш мумкин. Буюртмаларни қабул қилиш 30 апрелдан бошланади. Етказиб бериш майнинг иккинчи ярмига режалаштирилган.
Apple, шунингдек, тақдимот давомида iPadPro планшетларининг бешинчи авлодини намойиш этган бўлиб, унга ҳам М1 процессори ўрнатилган. Қурилма ташқи кўриниши жиҳатидан ўзгармаган бўлиб, унинг 11 ва 12,9 дюймли версиялари тақдим этилади. Катта iPadPro’нинг матрицаси миниLED инқилобий технологияси асосида яратилган.
Максимал ички хотираси 2 терабайтга етади, USB-C порти эса Thunderbold4’ни қўллаб-қувватлайди.
iPadPro планшетлари бешинчи авлод алоқа тармоқлари билан ишлай олади. Яна бир янгилик — фронтал камераси 12 мегапикселни ташкил этган. Қурилманинг 11 дюймли версиясини 800 долларга, 12,9 дюймлисини эса 1099 долларга олдиндан буюртма қилиш мумкин.
Бундан ташқари, Apple iPhone 12’ни янги рангда — бинафша рангида тақдим этди. У ўз линейкасидаги смартфонлардан рангидан бошқа ҳеч қандай жиҳати билан ажралмайди. Гаджетнинг нархи ҳам аввалгидек.
Шунингдек, Apple ўзининг биринчи «ақлли» тамғасини ҳам тақдим этган бўлиб, у харита орқали бошқа буюмлар жойлашган ўрнини кўрсата олади. Гаджет Apple қурилмаларига ўрнатилган «Локатор» дастури орқали ишлайди.
Компаниядагиларнинг ваъда қилишича, қурима махфийлик сиёсатига риоя қилади ва унинг ёрдамида одамларни кузатиш мумкин эмас. AirTags 29 доллар қийматида 23 апрелдан АҚШда сотувга чиқади.
Изоҳ (0)