2021 йилнинг дастлабки уч ойи ичида бутун дунё бўйлаб Жанубий Кореянинг Samsung компанияси энг кўп смартфон сотишга муваффақ бўлди. Бу ҳақда Strategy Analytics ҳисоботига таяниб, «Korrespondent.net» хабар берди.
Биринчи чорак давомида Samsung 77 миллион дона гаджет сотган — бу бозорнинг 23 фоизи демак.
Иккинчи ўринни Apple (57 миллион дона смартфон ва бозорнинг 17 фоизи) эгаллаган бўлса, учинчи поғона Xiaomi’га (49 миллион дона смартфон ва бозорнинг 15 фоизи) насиб этди.
Рейтингдаги тўртинчи ва бешинчи ўринларни Хитойнинг BBK корпорациясининг бўлинмалари эгаллади — Oppo (23 миллион смартфон ва бозорнинг 11 фоизи) ҳамда Vivo (20 миллион смартфон ва бозорнинг 11 фоизи).
Таъкидланишича, бутун дунё бўйлаб смартфонлар савдоси сезиларли даражада ошган. 2021 йилнинг биринчи чорагида жами 340 миллион дона смартфон сотилган — 2020 йилнинг мос даврида ушбу кўрсаткич 275 миллионни ташкил этганди.
Гаджетларга бўлган қизиқишнинг ошиши 5G технологиясининг тарқалаётгани билан боғланмоқда.
Аввалроқ Samsung ўзининг биринчи «гармошка» планшетини тақдим этишга тайёрланаётгани маълум бўлганди.
Изоҳ (0)