Хоразм вилоятининг Қўшкўпир туманида 2020 йилнинг июнида бир неча аёл бошқа бир аёлни уриб, сочларини қирқиб «самосуд» қилганди, ҳолат юзасидан жиноят иши қўзғатилганди.
Фото: ИИВ Тергов департаменти
Ўтказилган суриштирув давомида бунга 20 ёшли аёл Ҳ.О.нинг 3 нафар фарзанди бўлган эркак билан 2016 йилдан буён яшаб келаётгани сабаб бўлган. Д.К. уни ўғлининг оиласини бузганликда, уч нафар фарзанди етим қолаётганликда айблаб, яна уч аёл иштирокида кийимларини йиртиб, қўлларида бўлган таёқ билан уриб, дўппослаган, қайчи билан сочларини қирқиб ташлаган.
Суд-тиббий экспертиза хулосасида Ҳ.О.нинг чап билак, чап-ўнг елка, болдир, чап сон ва кўкрак қафаси қонталашлари бўлиб, енгил тан жароҳати олгани аниқланган.
ИИВ Тергов департаменти уни калтаклаган Д.К., ҳамда Д.О., Р.Н. ва Д.Р.га суд ҳукми ўқилганини маълум қилди. Жиноят ишлари бўйича Қўшкўпир тумани судининг ҳукмига кўра, Д.К., Д.О., Р.Н.га 1 йил-у 6 ой, Д.Р.га эса 1 йил муддатга озодликни чеклаш жазоси тайинланган. Жабрланувчи Ҳ.О.нинг уларга нисбатан ҳеч қандай даъвоси йўқлиги инобатга олинган.
