Қирғизистон парламенти депутатлари коронавирус билан оғриган беморларнинг жунғор айиқтовони (Aconitum soongaricum) заҳарли ўсимлиги билан даволанаётгани тўғрисида хабар берган мамлакат соғлиқни сақлаш вазири Алимқодир Бейшеналиевнинг ишдан олинишини талаб қилмоқда. Бу ҳақда «Интерфакс» хабар берди.

Фото: news.mail.ru

Қирғизистон парламенти матбуот хизмати вакилининг хабар беришича, парламентнинг ижтимоий масалалар, таълим, фан, маданият ва соғлиқни сақлаш қўмитаси аъзолари ҳукуматга вазирни лавозимидан четлатиш тўғрисида таклиф юбормоқчи. 19 апрель куни бўлиб ўтган қўмита йиғилишида бир овоздан шундай қарорга келинган.

Қирғизистон Соғлиқни сақлаш вазирлиги раҳбари Бейшеналиев 16 апрель куни бўлиб ўтган брифинг чоғида Қирғизистон шифокорлари коронавирус билан касалланганларни ўта заҳарли ўт — Иссиқкўл илдизи ёки жунғор айиқтовони деб аталувчи ўсимлик билан даволаётганини айтган эди.

«Касалхоналарда 200 га яқин коронавирус билан касалланган беморлар шифокорлар назорати остида Иссиқкўл илдизини қабул қилмоқда. Биз гиёҳни касалликни енгил шаклда ўтказаётган беморларга беряпмиз, уларнинг ҳеч бири ўлгани йўқ», — дейди Бейшеналиев.

Унинг сўзларига кўра, ҳозирги вақтда мамлакатда коронавирусни даволаш учун ишлаб чиқилган ушбу препаратнинг клиник синовлари ўтказилмоқда. Бейшеналиев маҳсулотни рўйхатдан ўтказиш режаларини эълон қилди.

Вазир дорини иссиқ ҳолда ичиш кераклигини таъкидлади. «Совуқ ҳолда ичган одам беш дақиқада ўлади», — деди у. Ўша куни Жаҳон соғлиқни сақлаш ташкилоти (ЖССТ) Қирғизистонда фойдаланилаётган Aconitum soongaricum дорисининг самарадорлиги тўғрисида ҳеч қандай маълумотга эга эмаслиги ҳақида баёнот берди.