Мода ихлосмандлари учун энг севимли бўлган оқ кофта гардеробдаги энг муҳим кийимлардан ҳисобланади. У билан исталган услубда кийиниш ва кўнгилдагидек кўринишга эга бўлиш мумкин.
Оқшом тадбири
Кечки зиёфат ва тадбирларга кофта ёки либос кийиш керак деб ким айтди? Бу борада супермодель Кейт Моссдан илҳомланиб, оқ кофта, қоплон принтли устки кийим кийишингиз мумкин. Қора ёпишиб турадиган шим, казаки этигини мослаш билан эса образингиз янада ўзига хос кўринади. Қора жинси исталган қоматни ўзига хос кўрсатиб, уни бичими кенг кофта билан кийиш қоматдаги камчиликларга урғу берилмаслигига сабаб бўлади.
Кўргазмалар
Музей ва кўргазмаларни яхши кўрадиганлар учун ҳам оқ кофта энг яхши вариант. Унга қора шим ва замш матосидан тикилган жилет ҳамда кроссовка қўшиш тавсия қилинади. Жилетнинг узунлиги ҳисобига қоматдаги муаммолар сезилмайди, кроссовкада эса ҳаракатланиш осон ва қулай бўлади. Агар қулайликдан ҳам кўра чиройли кўриниш сизни кўпроқ қизиқтирса, унда пойабзални пошнали туфлига алмаштирса ҳам бўлади.
Учрашув
Учрашувларга ҳаддан ортиқ очиқ бўлмаган, аммо шу билан бирга жозибали кўринишга сабаб бўладиган кийим-кечак кийган яхши. Бунинг учун жинси матосидан тикилган сарафан, оқ кофта билан ботинка ва ўзига хос пайпоқ кийишингиз мумкин. Белни нозик кўрсатадиган кофта билан ҳар доимгидан ҳам дилбар ва латофатли кўринишга эга бўласиз.
Иш билан боғлиқ учрашувлар
Ҳамкор, шерик ёки иш бўйича аҳамиятли киши билан учрашувда ўзига хос кўриниш ҳамда ўзига бўлган ишончнинг юқори бўлиши муҳим саналади. Бу борада оқ узун кофта сизга яхши ёрдам бера олади. Уни қалам шаклини эсга соладиган чарм матодан тикилган юбка, oversize пуловер ва боғичлари бор учли туфли билан кийиш тавсия қилинади. Ноодатий сумка тутиш орқали эса образ янада қизиқарли кўринишга эга бўлади. Образнинг афзаллиги шундаки, қора ранг қоматни ихчам кўрсатади. Кенг бичимли пуловер эса бел ва бўксадаги камчиликларнинг кўзга ташланмаслигига сабаб бўлади. Оч жигарранг туфли эса бўйни баланд, оёқларни эса узун кўрсатади.
Изоҳ (0)