Хитойнинг шимолидан бўрон олиб келган қум зарралари билан ифлосланиш оқибатида Пекин шаҳрининг осмони сариқ тусга кирди. Бу ҳақда Reuters хабар берди.
Фото: Reuters
«Хитойнинг шимолидан шамол олиб келган қум зарралари ва чангдан иборат улкан булутлар натижасида Пекин осмони сариқ тусга кирди, ҳавонинг ифлосланиш даражаси кескин ошди», — дейилади хабарда.
Маҳаллий ҳукуматнинг маълумот беришича, 14 апрель соат 16:00 ҳолатига кўра, асосан қум ва чангнинг катта зарралари туфайли Пекиннинг ҳаво сифати индекси 324 гача кўтарилди. Кечқурун шаҳарнинг баъзи қисмларида бу кўрсаткич 1300 дан ошди.
Фото: Reuters
Хитой метеорология бошқармасининг хабарига кўра, қум зарралари Мўғулистон ва Хитойнинг Ички Мўғулистон минтақасидан келган. Жума кунигача кучли шамол оқибатида Марказий ва Шарқий Хитойда ҳавонинг ифлосланиш даражаси ортиши кутилмоқда.
Таъкидланишича, ҳаводаги қум миқдори ўтган ойда Хитойнинг шимолида содир бўлган иккита қум бўронига қараганда камроқ, лекин шамол тезлиги юқорироқ бўлди.
Фото: Reuters
Хитой одатдагидек ҳар йилги қум бўронларига Мўғулистоннинг Гоби саҳроси сабабчи эканини таъкидламоқда.
Хитойнинг Гансу минтақаси делегатларининг март ойида парламентга берган баёнотида таъкидланишича, ҳар йили мамлакатга бўладиган қум бўронларининг ярмидан кўпи чет элдан, асосан, Мўғулистоннинг жанубидан келади.
See the sandstorm coming in Beijing today pic.twitter.com/ihng5lSkuE
— Zhou Lei (@ZhouLeiArt) April 15, 2021
Қум бўронларини тўсиш учун Пекин ҳукумати «Буюк яшил девор» лойиҳаси доирасида мамлакат чегаралари бўйлаб миллионлаб дарахтлар экмоқда.
