Наманган вилояти ИИБ ижтимоий тармоқларда ҳижобдаги ўқувчи қизларнинг ҳуқуқ-тартибот идораси ходими қаршисида тургани акс этган суратга муносабат билдирди.
Маълум қилинишича, 8 апрель куни Янгиқўрғон туманидаги 10-сонли мактаб томонидан туман ИИБга алоқа хати юборилган.
Унда мактабда аввалига 5 нафар, охирги кунларда 10 нафар қизлар белгиланган тартибдаги мактаб формасини кийиб юриш қоидаларига риоя қилмаётгани, уларга бир неча маротаба мактаб формасида, лозим бўлса, оддий рўмол ўраб келишлари тўғрисида тушунтирилгани, бироқ ота-оналар ҳам, қизлар ҳам мактабнинг ички тартиб-қоидаларига риоя қилмаётгани маълум қилинган.
10 апрель куни ушбу мактабда тарғибот ва ташвиқот ишларини олиб бориш мақсадида 9—11-синфлар ўртасида жиноят содир этилишининг олдини олиш юзасидан муҳокама йиғилиши ташкил этилган.
Муҳокама давомида алоқа хатида кўрсатилган қизлар билан профилактик суҳбатлар ўтказилган ва уларга Вазирлар Маҳкамасининг 2018 йил 15 августдаги 666-сонли қарори тушунтирилган.
«Суҳбат якунида ўқувчи қизларга мактабга белгиланган тартибда кийиниб келишлари, ҳижобда эмас рўмол ўрашлари мумкинлиги, бунга ҳеч ким қаршилик кўрсатмаслиги тушунтириб ўтилган», — дейилади муносабатда.
Эслатиб ўтамиз, ҳукуматнинг мазкур 666-сонли қарорида 2018/2019-ўқув йилидан бошлаб ўқувчиларнинг давлат умумий ўрта таълим муассасасига 1-иловага мувофиқ тасдиқланган шакллардаги мактаб формасида келишлари ихтиёрий, 2024/2025-ўқув йилидан бошлаб эса мажбурий ҳисобланади.
Мавзуга доир:
- «Қизим ҳижобда келишига рухсат берилмаса, отаси ўзини осиб қўяди». Тошкент ХТББ онани таҳдид қилганликда айбламоқда
- Шерзод Шерматов Избосканда мактаб директори рўмол ўраган ўқувчига «қаматаман» деб таҳдид қилгани айтилган мурожаатга муносабат билдирди
- Олий ва ўрта таълим вазири олий таълим муассасаларида ҳижоб ўраб юриш масаласига изоҳ берди
Изоҳ (0)