Австрия соғлиқни сақлаш вазири «ортиқча юк» туфайли истеъфога чиқди

Австриянинг соғлиқни сақлаш ва ижтимоий масалар вазири Рудольф Аншобер 13 апрель куни пандемия пайтида меъёридан ортиқ ишлагани ва соғлиғининг ёмонлашгани туфайли истеъфога чиқишини эълон қилди. Бу ҳақда «Korrespondent.net» хабар берди.

Аншобер ҳаддан ташқари кўп ишлаган ва чарчагани, соғлиқни сақлаш вазири сифатида ўзининг саломатлигига ҳам жавобгар эканини айтди.

«Пандемия даврида соғлиқни сақлаш вазири 100 фоиз соғлом бўлиши керак », — деб қўшимча қилди у.

Аншобернинг таъкидлашича, у фаолияти давомида мунтазам танқидларга учраган ва кўпинча таҳдидларга ҳам дуч келган.

«Мен қўлимдан келган барча ишни қилдим ва жуда катта масъулиятни ўз зиммамга олдим. Бир неча ҳафта олдин ўзимни яхши ҳис қилаётган эдим. Мендаги қанд миқдори ва қон босими ошиб кетди», — деди Аншобер.

Вазирнинг айтишича, шифокорлар унга дам олишни тавсия қилган, лекин пандемия даврида бунинг иложи бўлмаган.

Аввалроқ Чехия бош вазири Андрей Бабиш мамлакат соғлиқни сақлаш вазири Ян Блатнини ишдан бўшатишга қарор қилгани ҳақида хабар берди. Унинг ўрнига Прагадаги Буловца факультет шифохонаси директори Петр Аренбергер тайинланди. Аренбергер коронавирус пандемияси даврида Соғлиқни сақлаш вазирлигини бошқарган тўртинчи раҳбар бўлади.

Шунингдек, Бразилия президенти Жаир Болсонару ҳам Бразилия кардиологлар жамияти раҳбари, доктор Марселу Кейрога генерал Эдуардо Пазуэлланинг ўрнига соғлиқни сақлаш вазири лавозимига тайинланганини эълон қилди ва шу билан Кейрога мамлакатда коронавирус пандемияси даврида соғлиқни сақлаш вазири лавозимига тайинланган тўртинчи одам бўлди.