Ўзбекистон Судьялар олий кенгаши раисига ўринбосар ва котиб тайинланди, кенгаш таркибига ўзгартириш киритилди

Ўзбекистон Президентининг тегишли фармони билан Судьялар олий кенгаши раисига ўринбосар ва кенгаш котиб тайинланди. Бу ҳақда Судьялар олий кенгаши матбуот хизмати хабар берди.

Хусусан, фармон билан Алишер Жалилов Судьялар олий кенгаши раиси ўринбосари лавозимига тасдиқланди.

Алишер Жалилов 1974 йилда Қашқадарё вилоятида туғилган. Фаолиятини туман судининг суд мажлиси котиблигидан бошлаган. Ўтган йиллар давоми шаҳар суди судьяси, туман суди раиси, вилоят ва Олий судда судья лавозимида фаолият кўрсатган.Тайинловга қадар жиноят ишлари бўйича Сурхондарё вилояти Бойсун туман судининг раиси вазифасида ишлаган.

Шунингдек, Президент фармони билан Хуршид Содиқов ўз фаолиятини доимий асосда амалга оширувчи Судьялар олий кенгаши аъзоси – кенгаш котиби лавозимига тасдиқланган.

Хуршид Содиқов 1985 йилда туғилган. Фаолияти мобайнида жиноят ишлари бўйича Жиззах вилояти судида суд мажлиси котиби, бош мутахассиси, Олий судда катта маслаҳатчи, бўлим бошлиғи, Чиноз тумани маъмурий суди раиси вазифаларида ишлаган.Тайинловга қадар жиноят ишлари бўйича Зангиота тумани суди судьяси лавозимида ишлаган.

Бундан Ўзбекистон Президентининг тегишли фармони билан Судьялар олий кенгаши таркибига ўзгартиришлар киритилди:

• Турғунбой Буваев (бунгача Ўзбекистон Президенти Админстрациясида бош инспектор лавозимида фаолият юритган);
• Жанагул Балкибаевa (бунгача Олий суд судьяси лавозимида фаолият юритган);
• Нодира Бобохонова (бунгача Олий суд судьяси лавозимида фаолият юритган);
• Маликахон Каландарова (бунгача Судьялар олий кенгаши ҳузуридаги Судьялар олий мактаби кафедра мудири лавозимида фаолият юритган);
• Отабек Мирзамаҳмудов (бунгача Андижон вилояти маъмурий судининг раиси лавозимида фаолият юритган);
• Бахрам Сабиров (бунгача Ўзбекистон Президенти Админстрациясида етакчи инспектор лавозимида фаолият юритган);
• Ваҳоб Файзуллаев (бунгача Самарқанд вилоят судининг жиноят ишлари бўйича судьяси лавозимида фаолият юритган);
• Элза Шамсутдинова (бунгача Тошкент шаҳар судининг жиноят ишлари бўйича судьяси лавозимида фаолият юритган) Судьялар олий кенгашининг доимий асосда фаолият юритувчи аъзолари этиб тасдиқланди.