«Тошкент метрополитени»нинг поезди Чилонзор йўналишидаги «Пушкин» ва «Буюк ипак йўли» бекатлари оралиғида вагоннинг эшиги ёпилмаган ҳолда ҳаракатланди. Бу ҳақда блогер ва ҳуқуқшунос Хушнуд Худойбердиев маълум қилди.
«Бунақа даҳшатни фақат триллер киноларда кўриш мумкин эди, аммо ўз ишига масъулиятсиз инсонларнинг касрига, минг афсуски, бизда бунақа ҳолатлар кундалик воқеага айланиб қолаётгандек. Ишқилиб охири бахайр бўлсин. Бунга жавоб берадиган бирор зот борми?», — деб ёзади блогер.
Тошкент метрополитени мазкур ҳолатга изоҳ бериб, ёпилмаган эшик воқеаси бўйича суриштирув ишлари бошланганини маълум қилди.
Таъкидланишича, ҳар бир метро поездида локомотив эшик сигнализацияси мавжуд бўлиб, у поездларнинг очиқ эшиклари билан ҳаракатланишига йўл қўймайди. Бироқ эшикнинг ёпилишига сунъий халақит берилганида ёки ёпиш механизмига бирор буюм тушганида автоматик ёпилиш тизими ишламай қолади, чунки бу каби ҳолатларда эшикнинг пневматик магистрали ўчади.
«Вагонда фавқулодда ҳолатлар юзага келган тақдирда йўловчилардан ҳар бир вагонга ўрнатилган ‘йўловчи—машинист’ махсус алоқа мосламаси орқали машинистга хабар беришларини сўраймиз. Шунингдек, эшикларга суянмасликни ва автоматик ёпилиш вақтида уни ушлаб қолиб, ҳаракатга тўсқинлик қилмасликларини сўраб қоламиз. Автоматик эшикларни кўпинча йўловчилар вагонга сиқилиб кириш ёки кимгадир ёрдам беришда ушлаб қолади. Натижада поезд станцияда белгиланганидан узоқроқ қолиб кетиши мумкин», — дейилади хабарда.
Эслатиб ўтамиз, Тошкентда 8 апрель куни Сергели ерусти метросида поезд ярим йўлда тўхтаб қолиб, йўловчилар темир йўл бўйлаб пиёда юришга мажбур бўлгани, «Тошкент метрополитени» УК раҳбарияти воқеа жойида вазиятнинг сабабларини аниқлаётгани ҳақида хабар берилган эди. Тўхтаб қолган метро йўналиши — Олмазор станциясидан Қипчоқ станциясигача бўлган оралиқда вақтинчалик автобус йўналиши ҳаракати йўлга қўйилган. «Тошкент метрополитени» УК матбуот хизмати Сергели йўналишидаги поездлар ҳаракати соат 16:45 да тикланганини маълум қилди.
9 апрель куни «Беруний» метро бекатида икки поезд тўқнашгани айтилган видео тарқалди. Тошкент метрополитенининг ҳолат бўйича расмий изоҳида таъкидланишича, аслида тўқнашув содир бўлмаган, балки поезд бошқа поезд ёрдамида шатакка олиб «Беруний» бекатига олиб келинган.
Изоҳ (0)