Амитабҳ Баччаннинг муваффақиятга эришишига ҳисса қўшиш билан бирга, унинг хиёнатига кўз юмган актриса — Жая Баччан ҳақида қизиқарли фактлар

Замонасининг энг яхши актрисаси ҳисобланган Жая Баччан 2021 йилнинг 9 апрелида 73 ёшни қаршилади. Болливуд актрисасининг ҳаёти билан боғлиқ фактларни эътиборингизга ҳавола этамиз.

Қизлик фамилияси Бҳадури бўлган Жая, ёзувчи ва шоир Тарун Кумар Бҳадурининг қизи. У аъло баҳога ўқиган ҳамда Кино ва телевидение институтини олтин медалга битирган.

Актрисаликдан бошқа касбни тасаввур қила олмаган Жая, 14 ёшида режиссёр Сатяжит Рай томонидан «Катта шаҳар» фильмида суратга тушиш учун танлаб олинган. Фильм 1963 йилда экран юзини кўрган.

Жая 70 йилларда юлдузга айланиб бўлганида Амитабҳ Баччан эндигина кино оламига қадам қўйган. Уларнинг ҳар иккиси режиссёр Ришикеш Мукержининг «Гудди» фильмининг тасвирга олиш майдончасида танишган.

Амитабҳ Жаянинг севгилисини гавдалантириши керак бўлган, аммо роль Самит Бҳанжга насиб қилган. «Банси ва Биржу» (1972) улар иштирогидаги илк фильм бўлган. Кейинчалик «Такаббур», «Мили», «Қасос ва қонун» фильмларида иштирок этган.

Амитабҳнинг карьерасида рафиқасининг роли беқиёс, у ҳали танилиб улгурмаганида Жая у билан бирга бош қаҳрамон ролини ўйнашга рози бўлган. 1988 йил экран юзини кўрган ва Амитабҳнинг муваффақиятга эришишига сабабчи бўлган «Шаҳаншох» фильмининг сценарийсини Жая ёзган.

Амитабҳ замонавий ва шу билан бирга урф-одатларга амал қиладиган қизга уйланишни хоҳлаган. Журнал муқовасида Жаянинг суратини кўриб у мазкур образга мос келишини тушуниб етган. У интервьюлардан бирида «Гудди»нинг суратга олиш майдончасида танишгунча, журналда Жаянинг суратини кўриб ёқтириб қолгани, кўзлари уни ўзига ром қилганини айтган. Жая Амитабҳ билан ўртасидаги муносабатларни бир кўришдаги севги деб атаб бўлмаслиги, ҳақиқий туйғулар кейинроқ пайдо бўлганини таъкидлаган.

Жуфтликнинг тўйидан уч йил ўтиб, Амитабҳ Рекҳага илакишиб қолган. Уларнинг муносабатлари ҳақида гап-сўзлар болалаган бир вақтда Рекҳа, Риши Капур ва Ниту Сингхнинг тўйига мангалсутрда, синдур суртиб ташриф буюрган.Амитабҳ билан гаплашишга чиққан вақти камераларнинг бари уларга қаратилган. Шунда ҳамма Жая бошини илк бор эгган ҳолда ёш тўкканига гувоҳ бўлган. Аммо бу билан у таслим бўлишни истамаган. Рекҳани уйидаги кечки овқатга таклиф қилиб, турмуш ўртоғини унга бериб қўймоқчи эмаслигини тушунтириб қўйган.

Шундан кейин Жая эрига буткул ишониши ва бундай миш-мишлар киносаноат учун янгилик эмаслигини айтиб интервью берган. Жуфтлик ўртасидаги муносабатлар эса кундан-кунга яхшиланган ва бугунги кунгача ҳам улар оиласи билан боғлиқ миш-миш тарқалишига қараб турмайди.

Ҳаёти давомида 9 марта Filmfare мукофотини қўлга киритган актриса, яна кўплаб мукофотларга номзод бўлган. Актёр Дэнни Дензонгпа ва продюсер Ромеш Шармадан ташқари актрисанинг яна бир нечта яқин дўсти бор.