Ўзбекистонлик дзюдочилар Осиё-Океания чемпионатида 10 та медал билан жамоавий ҳисобда 2-ўринни эгаллади

Қирғизистоннинг Бишкек шаҳрида дзюдо бўйича Осиё-Океания чемпионати бўлиб ўтмоқда.

Ушбу мусобақада 29 мамлакатдан 195 нафар спортчи иштирок этмоқда. Ўзбекистон терма жамоаси мусобақанинг дастлабки уч кунида 10 та медални ўз ҳисобига ёздириб қўйди: 3 та олтин, 2 та кумуш ва 5 та бронза. Ўзбекистон умумжамоа ҳисобида 2-ўринни эгаллади.

Биринчи ўринда Жанубий Корея терма жамоаси (4 та олтин, 5 та кумуш, 8 та бронза) қайд этилган.

Ҳозирда бу кўрсаткич Ўзбекистон терма жамоасининг Осиё чемпионатлари тарихидаги энг яхши натижаси бўлиб турибди.

Сардор Нуриллаев (-66 кг), Давлат Бобонов (-90 кг) ва Гулноза Матниёзова Осиё чемпионига айланди.

9 апрелдан жамоавий мусобақалар бошланди. Дастлабки беллашувда Ўзбекистон терма жамоаси Туркманистонни 4:0 ҳисобида мағлубиятга учратди.

Эслатиб ўтамиз, мазкур мусобақада Токио—2020 Олимпиадаси учун зарурий рейтинг очколарини жамғариш имконини беради.