Наманганда 24 яшар йигит бошқарувидаги Damas шимолий Фарғона каналига ғарқ бўлди (видео)
Наманган вилоятининг Тўрақўрғон тумани, Бураматут қишлоғида яшовчи 24 яшар Ихтиёр Абдураҳмонов бошқарувидаги Damas автомашинаси бугун, 9 апрель куни Шимолий Фарғона каналининг Кужрон маҳалласи ҳудудидан оқиб ўтувчи 633-пикетида сувга ғарқ бўлди. Бу ҳақда «Дарё» мухбири Азизбек Абдувалиев хабар бермоқда.
«Эрталаб соат 7:00 лар чамасида қишлоғимиздан ҳашарчиларни далага олиб бордим. Ортга қайтмоқчи бўлиб, ўша ернинг ўзидан машинани қайтармоқчи эдим. Бирданига канал четидан тупроқ ўпирилиб, бошқарувни йўқотдим. Яхши ҳам тезда сакраб машинадан чиқиб олганим, йўқса мен ҳам сувга ғарқ бўлардим», — дейди Ихтиёр.
Йигит яқинларига воқеа ҳақида хабар берди, улар эса туман Фавқулодда вазиятлар бўлими билан боғланди. 20 дақиқа ичида етиб келган вилоят ФВ бошқармасининг махсус тезкор гуруҳи чўкиб кетган автомобилни қидиришни бошлади.
Damas 100 метрча нарига оқиб кетган экан. Автомобиль топилгач, бир соат вақт ичида уни қуруқликка олиб чиқишга эришилди.
Туман мелиорация бошқармаси вакилининг айтишича, каналдаги сувнинг ҳарорати 10 даража илиқ атрофида. Аммо оқим тезлиги унга тушган кишини карахт қилиб қўйиши мумкин. Бошқарманинг 7 нафар қутқарувчиси галма-гал сувда туриб, машинани автокраннинг металл тросларига уланишини таъминлади. Бир соат давом этган уринишлардан сўнг Damas қуруқликка чиқариб олинди.
«Шу ўринда бундай фавқулодда вазиятларда бизга кўмак бераётган туман йўллардан фойдаланиш унитар корхонаси жамоасига ҳам раҳмат айтамиз. Бугун ҳам уларга тегишли автокраннинг ёрдами жуда асқатди», — дейди туман фавқулодда вазиятлар бўлими бошлиғи, подполковник Фозилжон Хўжамбердиев.
