Рэпер Will.i.am «ақлли» ҳимоя ниқобини тақдим этди

Will.i.am тахаллуси остида ижод қилувчи америкалик қўшиқчи Уильям Жеймс Адамс наушниклар ва ёритиш тизимига эга ниқобни тақдим этди, деб хабар беради «Korrespondent.net».

2021 йил гаджети Xupermask номини олган. У мато ва силикондан ишланган, шунингдек, ёруғлик диодли ёритиш тизими, симсиз наушник ва микрофон қотиргичларга эга.

Ўлчами жиҳатдан универсал бўлган ниқобни тасмаси ёрдамида юзга мослаштириш мумкин.

Xupermask HEPA-фильтрлари ва ҳавони тозалашга мўлжалланган учта тезликка эга вентиляторлар билан жиҳозланган. Бундан ташқари, ниқоб электроника билан етти соат ишлашга ёрдам берувчи ва батареяни қувватлантира оладиган аккумуляторга эга.

Қиймати 299 доллар бўлган жамланмада Qualcomm QCC5124 чипи ўрин олган наушниклар ҳам бўлиб, у смартфонга Bluetooth 5.0 орқали улана олади ва уч ойга етадиган фильтри мавжуд.

https://www.instagram.com/p/CM53s7aFlxe/

Will.i.am’нинг айтишича, ниқобни яратиш ғояси Буюк Британиядан АҚШга амалга оширган авиапарвози вақтида туғилган. Рэпер оддий ниқоблар одамларга наушникда мусиқа тинглашга халақит бераётганини, шунингдек, ниқобларни кўзойнак билан тақиш ноқулайлигини пайқаб қолган.

Ниқобни ишлаб чиқариш билан Honeywell компанияси шуғулланган.

Аввалроқ Францияда коронавирусни йўқ қилувчи ниқоб яратилгани тўғрисида хабар берилганди.