Yaponiyaning Konami Sports kompaniyasi basseynda koronavirusdan himoya qila oladigan niqob ishlab chiqarishni boshladi. Bu haqda Asahi nashri xabar bermoqda.

Foto: Asahi

Niqoblardan murabbiylar bolalarga baqirib tushuntirishlar beradigan va ularga suvda mashg‘ulot o‘tadigan suzish sporti maktablarida foydalanish rejalashtirilgan.

Bir jamlanmada o‘nta niqob bo‘ladi va ularning narxi 29 ming iyena yoxud 260 AQSh dollariga baholanmoqda. Yaponiya hukumati 1-iyundan boshlab mamlakatda suv havzalarining ochilishiga ruxsat bergan.

So‘nggi ma’lumotlarga ko‘ra, Yaponiyada COVID-19 koronavirusi bilan kasallanganlarning umumiy soni 17 ming nafarga yetgan. 915 nafar odam infeksiya oqibatida hayotdan ko‘z yumgan, 14,9 ming nafar kishi esa kasallikdan tuzalgan.

Avval Reebok sport brendi odamlarni atmosferadagi xavfli zarralardan himoya qiladigan, kislorod miqdori hamda boshqa muhim ko‘rsatkichlar haqida ma’lumot beradigan uch xil niqobning prototiplari yaratilgani haqida xabar tarqatgan.