Ўзбекистон бош вазири ўринбосари, Туризм ва спорт вазири Азиз Абдуҳакимов Қатар авиация идоралари делегациясини қабул қилди, деб хабар бермоқда вазирлик матбуот хизмати.
Қайд этилишича, делегация Ўзбекистон ва Қатар ўртасида ҳаво қатновига доир ҳукуматлараро битим тузиш, шунингдек, икки мамлакат ўртасида тўғридан-тўғри йўловчи авиақатновларни йўлга қўйиш масалаларини ишлаб чиқиш мақсадида ташруф буюрган.
Учрашувда Қатар фуқаро авиацияси хизмати департаменти бошлиғи Муҳаммад Фалеҳ Алхажри Ўзбекистоннинг улкан сайёҳлик салоҳияти ҳамда бой тарихий-маданий меросга эгалиги Қатар фуқароларида юқори қизиқиш уйғотишини таъкидлаб ўтган. Унинг фикрича, Ўзбекистон билан Қатар ўртасида ҳаво қатнови тўғрисидаги битим имзоланиши икки мамлакат ўртасидаги ҳамкорлик алоқаларини янада фаоллаштириш, сайёҳлик ва ишбилармонлик алмашинувини жадаллаштирилишига хизмат қилади.
Qatar Airways департаменти раҳбари Salam Al-Samarriy авиакомпаниянинг Ўзбекистонга парвозларни амалга ошириш ва республиканинг минтақавий аэропортларида жорий қилинган «очиқ осмон» режимидан фойдаланишга, жумладан, Форс кўрфазининг бошқа мамлакатларидан ҳам сайёҳларни жалб қилишга юқори қизиқиш билдирган.
Вазирлик хабарида айтилишича, учрашув якунида томонлар ўзаро ҳамкорлик битим лойиҳаси юзасидан мавжуд масалаларни тезкор ҳал этиш, имзолаш ҳамда ҳамкорликни ривожлантириш, туризм соҳасида янги лойиҳаларни амалга оширишга доир мулоқотни давом эттиришга келишиб олди.
Эслатиб ўтамиз, Жисмоний тарбия ва спорт вазирлиги ҳамда Туризмни ривожлантириш давлат қўмитаси негизида Туризм ва спорт вазирлиги ташкил қилинди.
Аввалроқ Украина авиакомпанияси Тошкент ва Киев ўртасида рейсларни тиклашни режалаштираётгани, Uzbekistan Airways Тошкентдан Москвага мунтазам авиақатновлар тикланганини маълум қилгани, Uzbekistan Airways май ойидан бошлаб Ригага авиақатновларни қайта тиклаши ҳақида хабар берилган эди.
Изоҳ (0)