«Дорисида ‘ўйин’, овқатида ‘ўйин’ — ҳаммасида ‘ўйин’ ». Зоир Мирзаев Қашқадарёда бирорта касалхона аутсорсингга ўтмаётганини танқид қилди

Қашқадарё ҳокими Зоир Мирзаев вилоятнинг Касби туманидаги марказий шифохона фаолиятидан қониқмаслигини айтиб, беморларга пишириладиган овқатни беришда, уларни дори билан таъминлашда «ўйин» бўлаётганини билдирди. Бу ҳақда вилоят ҳокими бошчилигидаги масъулларнинг Касби халқи олдидаги ҳисоботида маълум қилинди, дея хабар берди «Дарё» мухбири.

Таъкидланишича, вилоят раҳбари ҳамда ҳудуддаги барча ташкилот ва корхона масъуллари 2 апрель, жума куни Касби туманининг Фазли қишлоғида бўлиб, халқ вакиллари олдида 2021 йилда туманда амалга ошириладиган ишлар юзасидан ҳисобот берган.

Тадбирда сўз олган вилоят ҳокими Зоир Мирзаев туман тиббиёт бирлашмаси фаолиятидан қониқмаётганини айтиб, «шифохона ҳолига маймунлар йиғлайди», деган.

«Қашқадарё вилоятидаги бирорта касалхона, жумладан, Касби туман касалхонаси нега аутсорсинг тизимига ўтмайди? Бош шифокор борми? Тўғри, бош шифокорнинг ёши улуғлигини инобатга олиб, ҳурмат қиламиз. Аммо шифохона ҳолига маймунлар йиғлайди. Шу сабаб тиббиёт хизматидан бутун халқ норози. Қани бирорта депутат ким биландир гаплашдими? Дорида ‘ўйин’, овқатда ‘ўйин’. Ҳаммасида ‘ўйин’. Нега Касбида бундай бўлиши керак», — деди вилоят ҳокими Зоир Мирзаев.

Ҳоким, шунингдек, тумандаги қишлоқ врачлик пунктларининг аҳолига зарур пайтда қулфлаб кетилишини, бунга бош шифокорлар эътибор ҳам қаратмаётганини танқид қилди.

«Бундан беш-олти ой илгари Касби туманига келганимизда 24 соат ўтириб, тез ёрдамнинг кўнгилдагидек ишлашини йўлга қўйиб, уларнинг хоналарини тиклаб берганмиз. Хўш, кейин-чи? Нима бўлди? Қишлоқ врачлик пунктлари кечки пайт қулфлаб кетилса, одамлар кечаси қаёққа боради? Ҳамма жойда касалнинг асосий қисми кечки пайт 7 дан, эрталаб 7 гача безовта бўлади-ку. Лекин шу пайтда қишлоқ врачлик пункти ёпиқ. Бош шифокорга эса бунинг фарқи йўқ. Мен яна айтаман, олдинги сафар ўзига ҳам айтгандим, бош шифокор фаолиятидан мутлақо норозиман», — деди Зоир Мирзаев.

Вилоят раҳбари ҳудуддаги мавжуд туман тиббиёт бирлашмалари беморларни овқат билан таъминлашда аутсорсинг тизимига ўтмаётганини алоҳида таъкидлаб, бу борада прокурорларга топшириқ берганини билдирди.

«Туман тиббиёт бирлашмаларида дори ва озиқ-овқатни қандай йўл билан оляпмиз, қаердан оляпмиз? Буни ўрганиш учун прокурорларга топшириқ бердим. Нега боғчалар, ҳарбийлар аутсорсингга ўтяпти, нега шифохона ўтмаяпти? Бизда гўшт олиб келиш керак, ‘балница’га бир кунда 40 килограмм гўшт. Униям 10 килосини кимдир еб кетди. ‘Балницаъда 400 нафар касал ётибди, нимагадир қозонда 200 нафар касалга овқат пишади. Шу овқатни ҳам ҳеч ким емайди. Шуни емаслигини ҳаммамиз биламиз. Чунки, беморнинг уйидан овқат келади», — деди вилоят раҳбари.

Зоир Мирзаев ҳудуддаги шифохоналарда тиббий хизмат бепул экани фақатгина қоғозларда қолиб кетаётганини, аммо амалда манфаатдорлик юқори даражадалигини қўшимча қилди.