АҚШнинг Жоржия штатидаги маҳаллий автосервиснинг Андреас Флатен исмли ходими бир неча ой олдин ишдан бўшаган. Ўтган вақт давомида собиқ ходим иш берувчидан сўнгги маошни олишга уринган. Натижада раҳбар эркакнинг уйига ёпишқоқ суюқлик суртилган 200 килограмм тангани олиб келган, деб хабар беради Motor.
Ходимнинг ишдан бўшатилишига унинг иш жойидан белгиланган вақтдан эрта кетиб қолавериши сабаб бўлган. Бироқ Андреас Флатеннинг сўзларига кўра, у суҳбат давомида боласини боғчадан олиб кетиш учун ишини соат 17:00 да тугатиши лозимлигини айтган. Автосервис раҳбарияти ушбу шартга рози бўлган, бироқ кейинроқ ўзини буни унутиб қўйгандек тутган.
Сўнгги бир неча ой давомида Андреас охирги бир ҳафталик маоши — 915 долларни олишга уринган. Вазиятни ҳал этиш учун эркак АҚШ Меҳнат вазирлигига мурожаат қилган ва ташкилот иш берувчининг зиммасига собиқ ходимдан қарздорлигини тўлаш мажбуриятини юклаган. Автосервис раҳбари қарзни қайтарган, бироқ маош сифатида қурилиш аравачасида бир сентли 200 килограмм танга олиб келиб, Андреаснинг уйи олдига тўкиб кетган.
Андреас аёли билан бирга машина мойига ўхшаш ёпишқоқ суюқлик сепилган 91,5 минг дона тангани уйига олиб кирган. Эркакнинг сўзларига кўра, бу каби тангаларни бирор бир банк ёки ичимликлар сотувчи автомат қабул қилмайди. Беш долларни ювиш воситалари ёрдамида тозалаш учун икки соатга яқин вақт талаб этилади. Тангаларнинг барчасини тозалашга қанча вақт сарфланишини тасаввур қилиш қийин. Автосервис эгасининг маълум қилишича, собиқ ходимга маошнинг қандай тўлангани аҳамиятсиз, муҳими унга тўлаб берилганида.
Изоҳ (0)