Олмалиқ шаҳар ҳокими Қобил Ҳамдамов коронавирусга қарши эмланди (видео)

Олмалиқ шаҳар ҳокими Қобил Ҳамдамов коронавирусга қарши вакцина билан кўнгилли равишда эмланди. Бу ҳақда шаҳар ҳокимлиги матбуот хизмати маълум қилди.

Ҳокимлик томонидан эълон қилинган видеода ҳоким AstraZeneca вакцинаси билан эмланганини кўриш мумкин.

AstraZeneca вакцинасининг тўлиқ эмлаш курси 2 дозадан иборат. Иккинчи доза биринчи доза билан эмлангандан 28 кун ўтиб юборилади.

Аҳолини коронавирусга қарши эмлаш тадбирлари 1 апрелдан бошланди. Ўзбекистонда бугунги кунда 1 миллион 660 минг доза вакцина бор. Уларнинг 660 минг дозаси COVAX жамғармаси томонидан олиб келинган AstraZeneca вакцинаси, 1 миллион дозаси — Ўзбекистон—Хитой ҳамкорлигида ишлаб чиқилган ZF-UZ-VAC 2001 вакцинаси.

Аҳолини ушбу вакциналар билан эмлаш бир пайтнинг ўзида амалга оширилади. Бунда эмланувчи биринчи эмланишни қайси вакцина билан бошласа, иккинчисини ҳам айнан ўша вакцина билан якунлайди. AstraZeneca вакцинаси билан 2 маротаба, ZF-UZ-VAC 2001 вакцинаси билан 3 маротаба эмлаш кўзда тутилмоқда. Яъни вакцинация икки хил вакцинада икки хил амалга оширилади. Шунингдек, Ўзбекистонда хусусий клиникаларга COVID-19’га қарши пулли эмлаш ўтказишга рухсат берилади. Тўлиқ эмлаш курсини тамомлаган фуқароларга QR-кодли сертификат берилади.

Нурмат Отабековнинг ўзи исталган вакцина билан жон деб эмланишини маълум қилган.

Эслатиб ўтамиз, бундан аввал Фарғона ва Самарқандда аҳолини коронавирусга қарши эмлаш тадбирлари бошлангани ҳақида хабар берилган, Ўзбекистон Соғлиқни сақлаш вазирлиги қаерда вакцинация жараёнлари ўтказилиши ҳақида маълумотни эълон қилган.