Гондурас президентининг укаси АҚШда бир умрлик қамоқ жазосига ҳукм қилинди

Гондурас президентининг укаси Хуан Антонио Эрнандес наркотик моддаларнинг ноқонуний савдоси учун АҚШда бир умрлик қамоқ жазосига ҳукм қилинди. Бу ҳақда Associated Press агентлигига таяниб «РБК» хабар берди.

Агентликнинг маълум қилишича, 2019 йилнинг октябрь ойида Эрнандес наркотик моддаларнинг ноқонуний савдосига алоқадорликда айбдор деб топилган. Унга энг камида 40 йиллик қамоқ жазоси хавф солаётган эди, лекин прокуратура бир умрлик қамоқ жазоси белгиланишини талаб қилди.

30 март куни Нью-Йорк суди айблов томонининг далилларини қабул қилди. Гондурас етакчисининг укасига бир умрлик қамоқ жазоси тайинланди, шунингдек, унга тегишли 138 миллион долларлик мол-мулкни мусодара қилиш ҳақида ҳукм чиқарилди.

Бундан ташқари, прокурор суд мажлисида Гондурас президенти Хуан Орландо Эрнандеснинг ўзини ҳам наркотик моддаларнинг ноқонуний савдосига алоқадор эканини таъкидлади.

Ўз навбатида, Гондурас етакчиси ўзининг Twitter саҳифасида аввалроқ прокуратура томонидан тақдим этилган асосий гувоҳнинг кўрсатмалари ёлғон деб топилганини ёзди.

Март ойининг ўрталарида Манҳэттен округ судида гондураслик наркобарон иши бўйича олиб борилаётган судда айбловчи томон гувоҳи йиллар давомида мамлакат президентлари ва вице президентига бир миллион доллардан ортиқ пул берганини таъкидлади.

Жиноий тўданинг собиқ раҳбари Дэвис Лионель Марадиганинг сўзларига кўра, Los Cachiros картели президент Хуан Орландо Эрнандеснинг опаси Ҳильда Эрнандесга 2012 йилда 250 минг доллар нақд пул берган. Ўша пайтда Эрнандес конгрессмен ва президентликка номзод эди. Яна 50 минг долларни 2014 йили, Хуан Орландо Эрнандес президент бўлганидан кейин унинг акаси Хуан Антонио Эрнандес олган.

Гондурас президенти айбловларни рад этиб, уларнинг сохталигини айтган.