Gonduras prezidentining ukasi Xuan Antonio Ernandes narkotik moddalarning noqonuniy savdosi uchun AQShda bir umrlik qamoq jazosiga hukm qilindi. Bu haqda Associated Press agentligiga tayanib “RBK” xabar berdi.
Agentlikning ma’lum qilishicha, 2019-yilning oktabr oyida Ernandes narkotik moddalarning noqonuniy savdosiga aloqadorlikda aybdor deb topilgan. Unga eng kamida 40 yillik qamoq jazosi xavf solayotgan edi, lekin prokuratura bir umrlik qamoq jazosi belgilanishini talab qildi.
30-mart kuni Nyu-York sudi ayblov tomonining dalillarini qabul qildi. Gonduras yetakchisining ukasiga bir umrlik qamoq jazosi tayinlandi, shuningdek, unga tegishli 138 million dollarlik mol-mulkni musodara qilish haqida hukm chiqarildi.
Bundan tashqari, prokuror sud majlisida Gonduras prezidenti Xuan Orlando Ernandesning o‘zini ham narkotik moddalarning noqonuniy savdosiga aloqador ekanini ta’kidladi.
O‘z navbatida, Gonduras yetakchisi o‘zining Twitter sahifasida avvalroq prokuratura tomonidan taqdim etilgan asosiy guvohning ko‘rsatmalari yolg‘on deb topilganini yozdi.
Mart oyining o‘rtalarida Manhetten okrug sudida gonduraslik narkobaron ishi bo‘yicha olib borilayotgan sudda ayblovchi tomon guvohi yillar davomida mamlakat prezidentlari va vitse prezidentiga bir million dollardan ortiq pul berganini ta’kidladi.
Jinoiy to‘daning sobiq rahbari Devis Lionel Maradiganing so‘zlariga ko‘ra, Los Cachiros karteli prezident Xuan Orlando Ernandesning opasi Hilda Ernandesga 2012-yilda 250 ming dollar naqd pul bergan. O‘sha paytda Ernandes kongressmen va prezidentlikka nomzod edi. Yana 50 ming dollarni 2014-yili, Xuan Orlando Ernandes prezident bo‘lganidan keyin uning akasi Xuan Antonio Ernandes olgan.
Gonduras prezidenti ayblovlarni rad etib, ularning soxtaligini aytgan.
Izoh (0)