Тошкентдаги бинонинг бир қисми қулагани акс этган видео тарқалди. Маълум бўлишича, бино бўлаги қулаган эмас, қулатилган

Ижтимоий тармоқларда Тошкентнинг Амир Темур кўчасидаги бинолардан бирининг бир бўлаги қулаб тушгани акс этган видеоёзув тарқалди. Автомобиль видеорегистраторидан олинган биринчи видеода бинонинг гўёки осилиб қолган бир бўлаги қулаб тушгандек кўринган; ҳодиса гувоҳи томонидан олинган иккинчи видеода эса бино бўлаги махсус воситалари билан ерга атайлаб тортилаётганини кўриш мумкин.

Тошкент шаҳар қурилиш назорат инспекцияси бош инспектори Собир Абулҳасановнинг «Дарё»га билдиришича, видеоларда акс этган ҳолат 28 март куни Абдулла Қодирий кўчаси, 1-уй манзилида жойлашган бино (собиқ «Аурум» ресторани ўрни)да юз берган. Унинг сўзларига кўра, бино деворининг 1,5 метрга 1 метр бўлган фасад қисми кўтарма кран орқали ажратиб олинган. «Ҳеч кимга жароҳат етмаган, қурбонлар йўқ, қўшни бинолар ҳам зарар кўрмаган», — дейди у.

Фавқулодда вазиятлар вазирлигидан қўшимча қилишларича, видеоларда акс этган ҳолат «режали бузиш ишлари» бўлиб, бузилган бино ўрнида кўп қаватли турар жой қурилиши режалаштирилган. «Ушбу бузиш ишлари барча хавфсизлик қоидаларига риоя қилинган ҳолда, девор билан ўраб олиниб, амалга оширилмоқда», — дейилади ФВВ ахборотида.