Тошкентдаги Республика шошилинч тиббий ёрдам илмий марказининг токсикология қабул бўлимида ишловчи шифокор аёлга маст эркак томонидан жиддий жароҳат етказилди, дея хабар бермоқда Соғлиқни сақлаш вазирлиги матбуот хизмати.

Фото: ССВ матбуот хизмати

Маълум қилинишича, 2021 йилнинг 24 март куни соат 23:15 ларда Республика шошилинч тиббий ёрдам илмий марказининг токсикология қабул бўлимига пойтахтнинг Олмазор туманида истиқомат қилувчи 37 ёшли фуқаро У.Н. онаси ҳамроҳлигида текширувга олиб келинган.

Беморнинг онаси токсиколог хонасида ўз хизмат фаолиятини ўтаётган навбатчи шифокор Н.Т.га ўғли бир неча кундан бери спиртли ичимлик ичаётганини билдирган.

Навбатчи шифокор ўша вақтда бошқа беморни тиббий кўрикдан ўтказаётганини ва бундан сўнг уларни ҳам қабул қилиб, керакли ёрдам кўрсатишга тайёрлигини билдирган.

Шунга қарамай, беморнинг онаси тиббиёт ходимларига нисбатан турли ҳақоратли ва туҳмат сўзлар билан эътироз билдиришни бошлаган. Бу ҳам етмагандек бемор У.Н. тўсатдан шифокор Н.Т.га оғир тан жароҳати етказган.

«Шифокор Н.Т.да бош мия шиши асорати кузатилиб, ‘Қўшма краниофациал жароҳат. Оғир даражадаги бош мия ёпиқ жароҳати. Бош мия оғир даражада лат ейиши. Субарахноидал қон қуюлиши. Бурун суяклари ва бурун тўсиғи синиб силжиши. Энса ва бурун соҳаларни юмшоқ тўқималарининг лат ейиши. Назогеморрея’ ташхиси билан нейрореанимация бўлимига ётқизилди. Айни пайтда у кучли карахтлик даражасида бўлиб, оғир аҳволда даволанмоқда. Бемор атрофдагиларга секин реакция бериб, мулоқотга киришишга қийналмоқда», — дейди ушбу марказ директори Дониёр Алимов.

Маълум қилинишича, хизмат вазифаси вақтида бемор томонидан ноҳақ калтакланган шифокор Н.Т. 2017 йилдан буён шифокор-токсиколог лавозимида ишлаб келмоқда, ўз хизмат вазифасини клиник протоколларга риоя қилиб, талаб даражасида бажариб келган.

Соғлиқни сақлаш вазирлиги ҳуқуқ-тартибот органларидан шифокорларнинг ҳақ-ҳуқуқларини қатъий ҳимоя қилишларини талаб қилган.

Бундан аввал Жиззахда чақирув бўйича етиб келган шифокор хонадон эгасининг ўғли томонидан калтаклангани, Самарқандда шифохона қоровули ва шифокорини урган шахсга нисбатан жиноят иши қўзғатилгани ҳамда Фарғонада тез ёрдам ходимларини калтаклаган шахс қамоққа олингани ҳақида хабар берилганди.