Сўнгги бир кеча-кундузда юз берган коронавирус билан боғлиқ энг муҳим хабарлар — «Дарё» коронадайжестида.

Жанубий Корея президенти Мун Чжэ Ин коронавирусга қарши эмланмоқда

Фото: EPA

Жанубий Корея президенти Мун Чжэ Ин ва унинг рафиқаси Ким Чжон Сук коронавирусга қарши эмланди. Улар AstraZeneca Британия-Швеция компаниясининг вакцинасини қабул қилди. Бунинг учун эр-хотин Сеулдаги Чонногу марказида жойлашган соғлиқни сақлаш жамоатчилик марказига келди.

Мун Чжэ Ин ва биринчи хоним июнь ойида Буюк Британияда бўлиб ўтиши кутилаётган G7 саммитида қатнашиш учун олдиндан COVID-19’га қарши эмланди. Жанубий Кореяда 23 мартдан бошлаб 65 ёшдан ошган одамлар коронавирусга қарши вакцина олади.

Сўнгги маълумотларга кўра, мамлакатда 99,4 мингдан ортиқ одам COVID-19’га чалинган, шуларнинг 1,7 мингдан ортиғи вафот этган.

Март бошида Мун Чжэ Ин коронавирусга қарши уруш бошланганини эълон қилган эди. У мансабдорлардан шай ҳолатда бўлишни талаб қилган ва аҳолини ниқоблар билан таъминлашга ваъда берган эди. Вирусга қарши курашга ҳукумат 30 триллион вон (25 миллион доллар) йўналтирмоқчи.

Жанубий Кореяда AstraZeneca вакцинаси февраль бошида маъқулланган.

Шу билан бирга, Литва президенти Гитанас Науседа ҳам AstraZeneca компанияси вакцинаси билан омма олдида эмланди.

«Мен ҳақиқатан ҳам аллақачон маъқулланган тўртта вакцинанинг барчаси ишончли ва самарали деб ҳисоблайман. Шунинг учун одамларни вақтни бекор сарфламасдан, кутмасдан ва ўйламасдан ўзлари хоҳлаган вакцина билан эмланишга чақираман», — деди у журналистларга эмланиб бўлганидан кейин.

Шунингдек, Литва бош вазири Ингрида Шимоните, сейм спикери Виктория Чмилите-Нильсен, соғлиқни сақлаш вазири Арунас Дулькис ҳам AstraZeneca вакцинасини қабул қилиши кутилмоқда.

Литва 19 март куни Евроиттифоқнинг баъзи мамлакатлари билан бир қаторда AstraZeneca билан эмлашни қайта бошлаган эди.

Германия канцлери Ангела Меркель мамлакатда карантин 18 апрелгача узайтирилишини маълум қилди. Пасха байрамида янада қатъийроқ чекловлар жорий қилинади. Мамлакатда карантин ноябрь бошида, қатъий чекловлар эса 16 декабрда киритилган эди. Карантин орқали ҳукумат COVID-19’нинг учинчи тўлқинини тийиб турмоқчи. «Биз ҳозир жуда жиддий вазиятдамиз», — деди Меркель матбуот анжуманида.

Беш кун мобайнида — 1—5 апрель кунлари мамлакатда деярли барча дўконлар ёпиқ бўлади. Диний ибодатлар онлайн режимга ўтказилади. 3 апрель, шанба куни фақат озиқ-овқат дўконлари ишлайди. Бундан ташқари, касалланганлар сони кетма-кет уч кун давомида ҳар 100 минг аҳолига 100 кишидан ошган ҳудудларда янада қатъийроқ қоидалар қўлланилади.

Германия март ойида чекловларни сусайтиришни бошлаган эди, аммо коронавируснинг юқумлироқ мутациялари аҳоли орасида тез тарқалиб кетди.

Ёшларни коронавирусга қарши эмлаётган мамлакатлар буни бошқа мамлакатларнинг хавф гуруҳидаги фуқаролари ҳисобига амалга оширилмоқда, деди Жаҳон соғлиқни сақлаш ташкилоти (ЖССТ) раҳбари Аданом Гебрейесус 22 март куни ўтказилган брифингда.

«Айни пайтда ёш ва соғлом одамларни эмлаётган мамлакатлар буни бошқа мамлакатлардаги соғлиқни сақлаш ишчилари, кексалар ва хавф гуруҳига кирувчи бошқа шахслар ҳаёти ҳисобига амалга оширмпқда», — деди у.

Гебрейесуснинг айтишича, дунё «ҳалокатли маънавий жарлик»ка қуламоқда, чунки COVAX халқаро механизми орқали вакциналарни олаётган камбағал мамлакатларда ва бой давлатларда COVID-вакцинация суръатлари ўртасидаги фарқ тобора катталашиб бормоқда.

Унинг таъкидлашича, бундай вазиятга дуч келмаслик мумкин эди, аммо ҳукуматлар бунинг учун етарли ҳаракат қилмади.

Шунингдек, ЖССТ раҳбари коронавирусга қарши вакцинанинг тенгсизлик билан тақсимланиши ҳар бир мамлакатда ҳам иқтисодий, ҳам эпидемиологик нуқтаи назардан мағлубиятга олиб келишини эслатди.

Шунингдек:

  • Исроилда 22 март ҳолатига аҳолининг ярми — 50,2 фоизи тўлиқ (иккита дозада) коронавирусга қарши эмланди. Мамлакатда жами 9 711 316 та эмлаш амалга оширилган. Битта дозада вакцина олганлар улуши эса 57,1 фоизни ташкил этмоқда.
  • Норвегияда AstraZeneca вакцинасини олган яна икки киши вафот этди. Ўлим ҳолатлари вакцина билан боғлиқ бўлиши мумкинлиги истисно қилинмаяпти. Аввалроқ вакцинациядан кейин беш киши касалхонага ётқизилган. Уларда тромбоз, қон қуйилиши ва тромбоцитларнинг кам миқдори аниқланган. Улардан бири ўтган ҳафта бошида вафот этган, энди эса яна иккита ўлим қайд этилган.
  • Россиянинг «Спутник V» вакцинасини маъқуллаган давлатлар сони 55 тага етди. Маврикия ҳозирча охирги бўлиб ундан фойдаланишга рухсат берди.